Sudani y’Epfo: Umunyamakuru w’Umunyamerika mu bantu 19 baguye mu mirwano ikomeye

Umunyamakuru w’Umunyamerika wakoreraga muri Sudani y’Epfo nk’umunyamakuru wigenga (freelance) ni umwe mu bantu 19 baguye mu mirwano  yabaye kuwa gatandatu hagati y’ingabo za leta n’inyeshyamba muri Leta ya Yei River nk’uko bitangazwa n’igisirikare.

Uyu  munyamakuru witwa Christopher Allen wakoreye ibinyamakuru bitandukanye, yiciwe mu mirwano ikomeye yabereye mu mujyi wa Kaya. Iki gihugu kikaba kiri mu makimbirane kuva mu 2013.

Santo Domic Chol, umuvugizi w’igisirikare, yabwiye Reuters ko mu nkengero z’ibirindiro by’ingabo hagaragaye imirambo 16 irimo umurambo w’umuzungu. Muri aba bapfuye hakaba hari harimo ngo n’inyeshyamba 3.

Umwe mu nyeshyamba avuga ko bababajwe n’urupfu rw’uyu munyamakuru Allen ngo wari uherutse no kubasura mu cyumweru cyabanjirije iyicwa rye. Ati: “Tubabajwe n’umuryango we. Yari yaje hano kuvuga inkuru yacu.” Yongeyeho ko Allen yisanze hagati mu mirwano nyamara yambaye umwambaro warangaga ko ari umunyamakuru uriho icyapa cya PRESS.

Umuvugizi w’igisirikare, Chol, akaba yakomeje avuga ko inyeshyamba zari zateye muri Kaya mbere yo gusubizwa inyuma mu mirwano yamaze isaha .

Amasezerano y’amahoro yashyizweho umukono muri Kanama 2015 Riek Machar agasubira mu murwa mukuru, Juba, muri Mata umwaka ushize, yaje kurengwaho muri Nyakanga 2016 ingabo za leta zisubiranamo n’iza Riek Machar we n’abarwanyi be bongera kujya mu buhungiro bava mu murwa mukuru.

Aya makimbirane akaba amaze gutuma abaturage basaga miliyoni 4 bamaze guhunga igihugu, aho muri Uganda gusa habarirwa impunzi zisaga miliyoni, mu gihe izindi zibarirwa mu 330,000 zahungiye muri Ethiopia.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com

 

from bwiza http://ift.tt/2vw7vn6
via IFTTT