Mu gihe mu Bufaransa hateraniye inama ya ba ambasaderi b’iki gihugu izageza kuwa Kane, inama perezida Emmanuel Macron agomba kugaragarizamo imirongo migari ya politiki ye mpuzamahanga, hari abasanga byihutirwa kubanza kuvugurura umubano w’iki gihugu n’u Rwanda na cyane ko perezida Kagame ari we uzaba uyoboye Afurika Yunze Ubumwe mu mwaka utaha.
Mu mezi atanu ari imbere nibwo perezida Paul Kagame azatangira kuyobora Afurika Yunze Ubumwe (A.U.), kandi akaba yarijeje amavugurura yimbitse. Iyi manda ariko Abafaransa basanga itazorohera politiki y’u Bufaransa muri Afurika.
Impamvu zitangwa nk’uko iyi nkuru dukesha ikinyamakuru Libération ikomeza ivuga, harimo kuba igihugu cy’u Bufaransa cyarabangamiye umutwe wa FPR Inkotanyi ubwo wari mu rugamba rwo kubohoza u Rwanda nubwo bitawubujije guhagarika jenoside yakorerwaga Abatutsi mu 1994, no kuba kuri ubu perezida Kagame asigaye agaragara nk’umuyobozi mukuru wa Panafricanisme, akaba akunzwe cyane n’abatifuza icyenewabo, ruswa no guhora mu bukene.
Perezida Kagame kandi ashimirwa kuba yarabashije gutuma abaturage barebanaga ay’ingwe babana mu mahoro, guca ruswa kurinda umutekano w’ishoramari no kuba yarashyizeho urwego rw’imisoro ngo rukomeye utagereranya n’ahandi muri Afurika y’abirabura.
La Libération ikomeza igaragaza ko Kagame yateje imbere uburezi umubare w’abatazi gusoma ukagabanyuka ku rwego rwo hejuru mu rubyiruko, kubaka ibikorwaremezo bijyanye n’ubuvuzi no kuba yarashyizeho ubwisungane mu kwivuza kuri ubu Umunyarwanda akaba afite icyizere cyo kubaho byibuze imyaka 64 mu gihe kuva nyuma y’ubukoloni yari afite icyizere cyo kumara imyaka 42. Ni mu gihe muri Congo icyizere cy’ubuzima ari imyaka 49.
Mu 2006, u Rwanda rwacanye umubano n’u Bufaransa bitewe n’impapuro zo guta muri yombi bamwe mu bayobozi b’u Rwanda zari zasohowe n’umucamanza Jean-Louis Bruguière. Uyu mucamanza akaba yarashinjaga bamwe mu begereye perezida Kagame kuba barahanuye indege ya perezida Habyarimana bikaba intandaro ya Jenoside yakorewe Abatutsi.
Nyuma yaho, perezida Sarkozy yagerageje kubyutsa umubano w’u Bufaransa n’u Rwanda, ariko u Rwanda rwanga kwakira ambasaderi wari woherejwe.
Haribazwa uko u Bufaransa bwiteguye kuvugurura umubano wabwo n’u Rwanda
Ku ikubitiro, iki kinyamakuru gisanga u Bufaransa bukwiye kwemera gushyira ku mugaragaro inyandiko zigaragaza uruhare rwabwo mu Rwanda kuva mu 1990 kugeza mu 1994. Iki ngo ni ikintu cyoroshye kandi cyaba ikimenyetso gikomeye.
Icya kabiri, ngo ni ugushyiraho ingamba zigamije gushyira ku rwego rugezweho umubano w’ibihugu byombi no gukura igitotsi cyose muri dipolomasi y’ibihugu byombi. Ngo ubwiyunge bw’u Bufaransa n’u Rwanda bukaba ari igeragezwa rikomeye ku bushobozi bwa perezida Emmanuel Macron mu rwego rw’amavugurura yijeje agamije inyungu z’u Bufaransa, hakaba hategerejwe kurebwa uko azitwara mu mezi atanu ari imbere.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
from bwiza http://ift.tt/2gotlGq
via IFTTT
No comments:
Post a Comment