Igihe: Mountain Gorilla Rally 2017 yagarutse, abanya- Kenya na Zambia barahabwa amahirwe

Ishyirahamwe ryo gusiganwa mu mamodoka mu Rwanda (RAC) riri hafi kugera ku musozo w’imyiteguro ya “Rwanda Mountain Gorilla Rally 2017” izabera mu turere dutatu. Abeza kurusha abandi muri Afurika barimo abanya-Kenya n’abanya-Zambia bazahurira mu Rwanda.

Tariki ya 8-9 Nzeri 2017 abanyarwanda bazongera kwishimira kubona isiganwa ry’amamodoka mpuzamahanga Rwanda Mountain Gorilla Rally 2017. Abasiganwa bazagera mu turere dutandukanye nka; Gasabo, Rwamagana na Bugesera.

Mu ngengabihe yashyizwe hanze na RAC igaragaza ko iri siganwa rizatangizwa ku mugaragaro kuri Kigali Convention Center, mugitondo cyo kuwa Gatanu tariki ya 8 Nzeli 2017 bahite berekeza mu Karere ka Rwamagana ahazakinwa uduce tune i Rugende n’i Ruhanga.

Nyuma ya saa sita, abasiganwa bazagaruka mu mujyi wa Kigali kuri Sitade Amahoro aho batangirira mu marembo areba RGB bagasohoka, bakajya gukatira mu kibuga bigishirizamo imodoka bagasoreza muri sitade hasiganwa imodoka ebyiri ebyiri.

Ni inzira igiye gukoreshwa bwa kabiri muri Rwanda Mountain Gorilla Rally, isiganwa rya gatanu muri atandatu ari ku ngengabihe Nyafurika yo gusiganwa mu mamodoka.

Iri siganwa rigiye gukinwa ku nshuro ya 16 rizasozwa kuwa Gatandatu, tariki ya 9 Nzeli 2017 bakinire mu Bugesera ahazakinwa uduce 10 banyura Nyamata, Gashora na Gako.

Umunyamabanga wa RAC, Ange Francois Cyatangabo yabwiye abanyamakuru ko iri siganwa riteganyijwemo udushya dutandukanye, kandi rizaryoshywa n’ihangana ry’abanya Kenya n’abanya Zambia bahanganiye umwanya wa mbere muri Afurika.

“Uyu mwaka batatu ba mbere muri shampiyona nyafurika baregeranye bivuze ko uzegukana Mountain Gorilla bishobora kurangira yegukanye na shampiyona nyafurika. Bizaryoshya isiganwa ryo mu Rwanda kuko bizazamura ihangana.

Tuzagira amahirwe yo kubona imodoka yakorewe gusiganwa yo mu bwoko bwa ‘ŠKODA Motorsport’ izazanwa n’umunya-Kenya. Abakunzi b’umukino bazaryoherwa kuko twanateguye uburyo bazakurikirana isiganwa mu mutekano, bitandukanye n’imyaka ishize. Hanateganyijwe kajigujugu (helicopter) yatanzwe n’Akagera Aviation”

Umunya-Kenya Manvier Baryan niwe uyoboye akurikiwe n’umunya-Zambia Leroy Gomes naho Jaspreet Chatthe wo muri Kenya watwaye Rwanda Mountain Gorilla Rally ya 2015 ni uwa gatatu muri Afurika.