Kitoko yasubiye mu Bwongereza

Kitoko Bibarwa wari watumiwe mu bitaramo byo kwamamaza umukandida wa RPF Perezida Paul Kagame, yasubiye mu Bwongereza.

Kitoko ari kumwe n’umuryango we mbere yo gusubira mu Bwongereza

Saa kumi n’ebyiri z’igitondo cyo kuri uyu wa gatatu tariki ya 30 Kanama 2017 nibwo Kitoko yerekeje ku kibuga cy’indege i Kanombe. Yari afite indege ya saa mbiri.

Mbere yo gufata urwo rugendo asubira mu Bwongereza, Kitoko yabwiye Umuseke ko yishimira cyane ibihe yagiriye mu Rwanda kandi ko agiye kujya agira ingendo nyinshi zigaruka.

Mu bintu avuga byamunejeje mu gihe cy’ukwezi n’iminsi 18 yari amaze mu Rwanda, harimo kuba noneho abacuruzi basigaye bakora amasaha 24/24.

Ibi ngo biri mu bintu bituma umunyamahanga wese ugeze mu Rwanda yishimira service ihatangirwa kubera kutagira icyo abura.

Ati “u Rwanda ni rwiza cyane!! Ni ahantu umuntu yakwifuza gukorera ibikorwa bye bitandukanye kubera iterambere mu ngeri zose rihari. Nsubiye mu Bwongereza ariko ngiye kuba umuvugizi w’igihugu cyanjye ku iterambere tumaze kugeraho”.

Kitoko ni umwe mu bahanzi bagaragaye mu bitaramo byo kwamamaza ishyaka rya RPF ryari rihagarariwe na Perezida Kagame

Yakomeje avuga ko atazongera kumara imyaka irenga ine ataragaruka kubera ibikorwa assize adatunganyije kandi biri ngombwa ko yitaho.

Kitoko yaje mu Rwanda tariki 12 Nyakanga 2017. Yageze i Kigali saa ine z’ijoro asanga imbaga y’abantu i Kanombe imutegereje.

Yahise ajyanwa kuba muri Convention hasanzwe hakirirwa ibyamamare. Mu gihe gito ahava yerekeza ahitwa muri Grazia Hotel .

Joel Rutaganda

UMUSEKE.RW

from UMUSEKE http://ift.tt/2xLAGTB