Igihe: Umwuzure udasanzwe ukomeje gushyira ibihumbi by'Abanyamerika mu kaga-Amafoto

Iyi niyo mvura idasanzwe iguye muri Leta ya Texas muri Leta Zunze Ubumwe za Amerika mu mateka yayo. Leta ikomeje ibikorwa byo guhungisha abantu kuko ngo uyu mwuzure ushobora gukomeza kwiyongera.

Iyi mvura idasanzwe yaje gukurikirwa n'umwuzure yatangiye kugwa i Texaskuva kuwa Gatanu ushize tariki ya 25 Kanama ikaba ikiri kugwa kugeza ubu. Abantu bagera kuri Cumi n'umunani bamaze kuhasiga ubuzima nk'uko Daily Mail dukesha iyi nkuru ibitangaza.

Leta zitandukanye zifatanyije n'imiryango itandukanye ziri gutanga ubufasha kuri Texas aho abantu bari kujyanwa mu nkambi bagashakirwa aho bikinga, kuri ubu abasaga ibihumbi 20 bakaba bamaze kugezwa muri iyo nkambi.

Uretse Leta ya Texas, uwo mwuzure watangiye no kugera muri Leta ya Louisiana kuri ubu Guverineri John Bel Edwards akaba yamaze kuburira abantu gutangira kuva mu duce tumwe na tumwe uyu mwuzure watangiye kwibasira bagatangira gushaka aho bikinga.

Iyi mvura imaze kwangiza ibintu bitabarika muri Texas, ubu bimwe mu bikorwa bitandukanye birimo ibigo by'amashuri, amavuriro n'ibitaro, ibibuga by'indege biri mu mujyi wa Houston byamaze gufunga mu gihe bagitegereje ko uyu mwuzure watanga agahenge n'ubwo uko bwije bikomeza kugenda bifata indi ntera.