Kuwa 28 Kanama 2017, itsinda ryábanyeshuri 23 baturutse muri Uganda Christian University (UCU) mu Gihugu cya Uganda ndeste n’itsinda ry’abashyitsi b’Itorero Methodiste mu Rwanda bagera kuri 18 basuye urwibutso rwa Jenoside yakorewe Abatutsi rwa Nyamata mu Karere ka Bugesera.
Nyuma yo gusobanurirwa amateka ya Jenoside yakorewe Abatutsi mu Rwanda, by’umwihariko I Nyamata,umukozi wa Komisiyo y’Igihugu yo Kurwanya Jenoside (CNLG) Muberuka Leon wabakiriye yabafashije gusura ibice bitandukanye bigize urwibutso anabasobanurira.
Jenoside yakorewe Abatutsi i Nyamata
Perezida Habyarimana akimara kwicwa ku itariki ya 6 Mata 1994, Jenoside yahise itangira mu Bugesera. Ku itariki ya 07 Mata 1994, abahezanguni b’Abahutu batangiye gutwika inzu z’Abatutsi I Nyamata, ariko kubera ko I Nyamata hari Abatutsi benshi muri ako gace batangiye kwirwanaho.
Ku itariki ya 11 Mata 1994, Abatutsi benshi bari baramaze kuva mu byabo bahungira mu kibuga cy’ishuri ribanza rya Nyamata. Abagore n’abana bahunmgiye muri kiliziya ya Nyamata mu gihe abandi bari bari ku ishuri ry’imyuga iciriritse rya Nyamata (Centre d’Enseignement Rural et Artisanal Integré (CERAI).
Ubwicanyi kuri CERAI bwatangiye mu gitondo cyo ku itariki ya 11 Mata 1994. Abishi bagose aho Abatutsi bari bari batangira kubateramo amagerenade no kubarasa. Nyuma abishi bazanye ifu y’urusenda baminjira hejuru y’imirambo kugira ngo barebe niba hari abakirimo akuka ngo babicishe imihoro.
Claire Nkima, warokokeye kuri CERAI ya Nyamata, avuga ko abarokotse ibyo bitero bagerageje guhungira I Gitarama n’I Burundi ariko benshi muri bo bakaza kwicirwa mu nzira kuko abicanyi bari barashyize za bariyeri mu mayira.
Hagati y’itariki ya 14 na 16 Mata 1994, abagera ku 5,000 bari bamaze kwicirwa muri Kiliziya ya Nyamata. Bake barokotse igitero cyo muri Kiliziya bagerageje kwihisha mu rufunzo no mu bindi binani, ariko nyuma yahoo benshi muri bo bagendaga bicwa n’interahamwe zahoraga zishakisha aho bihishe kugeza Inkotanyi zihageze zikabarokora.
Urwibutso rwa Jenoside rwa Nyamata
Mu 1959 na 1960, Abatutsi bavanywe mu duce dutandukanye tw’igihugu bajyanwa gutura i Nyamata ku ngufu, agace karangwaga n’ishyamba ndetse n’isazi ya Tsetse. Mu 1980, bamaze kuhatunganya no kuhagira heza, hubatswe Kiliziya. Mu 1994, iyo kiliziya yabaye ibagiro ry’Abatutsi bari bahahungiye ubwo interahamwe zabiraragamo zikabatemagura zibateramo n’amagerenade, hagapfa abantu barenga ibihumbi mirongo ine na bitanu mu munsi umwe.
Nyuma y’imishyikirano hagati ya Kiliziya Gatolika na Leta y’u Rwanda , iyo kiliziya n’aho yubatswe habaye urwibutso rwa Jenoside yakorewe Abatutsi. Urwo rwibutso rugizwe n’aho abakirisitu bicaraga ubu hakaba hari imyenda abishwe bari bambaye ,ibikoresho abicanyi bakoresheje birimo imihoro, amacumu, ibyuma n’ibindi. Uhasanga n’amashapule abishwe bari bambaye. Muri “cave” hari imibiri y’abishwe muri Jenoside yakorewe Abatutsi ikaba iri mu birahure biyikingiye ariko bitayibuza kugaragara.
Iruhande rw’iyi kiliziya kandi hari imva ya Antonia Locateli, umubikira w’umutaliyani kazi wishwe arashwe ku itariki ya 9 Werurwe 1992, nyuma yo gutanga amakuru kuri Radiyo mpuzamahanga y’Abafaransa (RFI) ndetse n’iy’Abongereza (BBC) yamagana iyicwa ry’Abatutsi ryari rimaze guhitana abasaga 500 mu cyumweru kimwe .
Src:CNLG
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
from bwiza http://ift.tt/2wVdS6Q
via IFTTT
No comments:
Post a Comment