Kampala – Umugore wa 18 yishwe

Mu gace ka Kitabi, Entebbe mu karere ka Wakiso Police yahatoye umurambo w’umugore w’ikigero cy’imyaka 30 mu gitondo cyo kuri iki cyumweru nk’uko byemejwe n’umuvugizi wa Police yo muri uyu mugi.

Muri iki gice cya, Kitabi, Nansana, Entebbe hamaze kwicwa abagore 18 kuva mukwa gatanu

Ni umugore wa 18 ubonetse yiciye muri aka gace ka Kitabi kuva mu kwezi kwa gatanu. Abishwe biganjemo abakora uburaya.

Police yajyanye uyu murambo, wari utangiye kubora, kuwusuzuma ngo barebe ko bamenya icyamuhitanye nk’uko bitangazwa n’ikinyamakuru Monitor.

Uyu mugore utaramenyekana imyirondoro kandi ngo hahise hatangira iperereza ku gushakisha ababa baramuhitanye mu minsi micye ishize.

Mu cyumweru gishize umuyobozi mukuru wa Police ya Uganda IGP Kale Kayihura yatangaje ko abica aba bagore ari ababatangaho ibitambo bya gipagani ngo bongere ubukire.

Hari umwe mu bafashwe wemeye ko yishe abagore umunani ku kazi yahawe n’umukire umwe mu gace ka Nansana kugira ngo amaraso yabo ayatangeho igitambo yongere ubukire.

UMUSEKE.RW

from UMUSEKE http://ift.tt/2wSHvpv