I Kigali harateranira inama itegura inama y’Umuryango w’Abibumbye ku kubungabunga amahoro

Guhera kuri uyu wa Kabiri, itariki 29 kugeza kuwa 30 Kanama 2017, u Rwanda rurakira inama itegura inama ya za minisiteri z’ingabo ku bikorwa byo kubungabunga amahoro by’Umuryango w’Abibumbye. Inama nk’izi zitegura iyi nama zigiye kubera no muri Bangladesh no mu Buyapani zitezweho guharurira inzira iyi nama ya za minisiteri iteganyijwe I Vancouver muri Canada guhera kuwa 14 kugeza kuwa 15 Ugushyingo muri uyu mwaka.

Iyi nama igiye kubera i Kigali biteganyijwe ko izabera muri Kigali Convention Centre, izahuriza hamwe abantu basaga 100 baturutse mu bihugu bifite abasirikare n’abapolisi mu bikorwa byo kubungabunga amahoro by’Umuryango w’Abibumbye.

Abazitabira iyi nama bazaganira ku kurinda abari mu byago no ku kijyanye no gutabara byihuse. Hakazibandwa ku kuntu hakongerwa ingufu mu bikorwa byo kurinda abasivili. Hazanibandwa ku kijyanye n’uburinganire mu bikorwa byo kubungabunga amahoro n’ibindi.

Iyi nama ya za minisiteri z’ingabo ku bikorwa byo kubungabunga amahoro bya Loni, yashyiriweho kurushaho gushishikariza amahanga kugendana n’Amasezerano ya Kigali (Kigali Principles) no gushaka uburyo bushya bwo kurushaho gukora neza mu kurinda abasivili.

Inama ya za minisiteri z’ingabo ku bikorwa bya Loni byo kubungabunga amahoro muri uyu mwaka wa 2017 izubakira ku zindi nama zabanje muri New York na London hongera korebwa umusanzu w’ibihugu biri muri Loni ndetse no gushakira abari mu bikorwa byo kubungabunga amahoro ibyo bakeneye kugirango barusheho kuzuza inshingano zabo.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com

from bwiza http://ift.tt/2xGpoQq
via IFTTT