Uyu mwaka turaganura Perezida Kagame twishyiriyeho - Minisitiri Uwacu Julienne

Umunsi w'umuganura kuri ubu mu Rwanda ufatwa nk'umunsi ukomeye cyane ko aribwo Abanyarwanda bishimira umusaruro w'ibyagezweho, ukaba kandi n'umunsi Abanyarwanda basangira ibyo byiza byagezweho ndetse bakaboneraho no kugira imihigo bahiga ijyanye n'ibyo baba bifuza kuzageraho mu gihe cy'umwaka. Umunsi w'umuganura kuri iki Cyumweru wijihirijwe mu midugudu igize uturere twose tw'igihugu, aho Abanyarwanda bose bongeye kuzirikana ko Umuco w'abanyarwanda ukwiye gukomeza kuba isoko y'ubumwe no kwigira, abanyarwanda bishimira ko ibyo bagezeho ari byinshi bikubiye mu musaruro w'ubuhinzi n'ubworozi, ukomoka mu nganda ndetse no mu bikorwa binyuranye.

Mu kugaragaza umusaruro wagezweho n'abaturage bamwe mu batuye mu karere ka Nyanza kabereyemo ibi birori ku rwego rw'igihugu, hatanzwe ubuhamya bw'inzira y'iterambere aho uwitwa Ngendahayo Alex yagaragaje urugendo rw'iterambere yanyuzemo akirangiza amashuri yisumbuye aho yihangiye imirimo abinyujije mu gukorana n'ibigo by'imari nka gahunda Leta y'u Rwanda yageneye urubyiruko. Kuri ubu uyu Alex akaba afite ivuriro ricuruza imiti y'amatungo, ndetse akaba agiye kuzuza inzu yo kuzaturamo we n'umuryango kandi akaba yarabashije kwiyishyurira amashuri ya Kaminuza ndetse akaba arimo kwiga n'icyiciro cya gatatu (Masters) kandi akaba yiyishyurira ku mafaranga yakuye mu maboko ye. Uyu Alex akaba yasabye urubyiruko kudacikanwa n'amahirwe bashyirirwaho na Leta y'u Rwanda iyobowe na Perezida Kagame.

Umuyobozi w'akarere ka Nyanza, Ntazinda Erasme yavuze ko muri aka karere n'ubwo uyu mwaka ushize mu gihugu hose hakunze kubaho imihindagurikire y'ibihe igatuma abahinzi borozi batabona umusaruro utubutse ariko mu karere ayobora ho umusaruro ngo wariyongereye muri uyu mwaka aho basaruye toni zisaga miliyoni 6 z'umuceri, umukamo w'amata ukaba warageze kuri litiro miliyoni 5, naho ibishyimbo bikaba byarageze kuri toni 26 ndetse n'umusaruro uturuka mu nganda ukaba wariyongeye.

Mu mpanuro yageneye Abanyarwanda kuri uyu munsi w'Umuganura, Minisitiri w'Umuco na Siporo, Uwacu Julienne, yavuze ko ibyagezweho n'abanyarwanda mu mwaka ushize ari byinshi ariko byose babikesha ubuyobozi bwiza buyobowe na Nyakubahwa Paul Kagame ari nayo mpamvu Abanyarwanda banezerewe ku kuba barongeye kumutora mu ntangiriro z'uku kwezi kwa Kanama 2017.

Minisitiri Uwacu yagize ati “Uyu muganura mu mwaka wa 2017 ni umwihariko kuko abanyarwanda baganura ubuyobozi bwiza bishyiriyeho, bihitiyemo by'umwihariko binyuze mu matora y'umukuru w'igihugu tukaba twaritoreye Perezida wa Repubulika utubereye Nyakubahwa Paul Kagame, twatoye tariki ya 4 Kanama, hanyuma indahiro ye nk'igihango yagiranye n'abanyarwanda iba ku itariki ya 18, murumva ko uku kwezi ni ukw'ibirori n'ibyishimo kandi dukwiye kwishimira buri wese uruhare yabigizemo kandi nk'uko byabaye no mu tundi turere, Nyanza mwitwaye neza mutanga umusaruro ushimishije muri ibi byiciro byose”

Minisitiri Uwacu kandi yavuze ko n'ubwo umunsi nk'uyu Abanyarwanda baba bishimira ibyagezweho ariko banaboneraho kuzirikana abakurambere n'umuco mwiza basigiye u Rwanda n'Abanyarwanda, ari na ngombwa guharanira ko uyu muco utazazima ahubwo uzakomeza gusigasirwa ugatozwa na Rwanda rw'ejo aribo bana n'urubyiruko.

Ibirori byo kwizihiza umunsi w'umuganura wijihijwe kuri uyu wa 27 Kanama 2017 byabereye mu karere ka Nyanza bikaba byarabimburiwe n'igitaramo Nyanza Twataramye cyabaye mu ijoro ryo ku wa 26 Kanama ndetse n'imurikabikorwa ryabereye muri Sitade ya Nyanza mu rwego rwo kugaragaza ibyagezweho n'abatuye aka karere muri uyu mwaka ushize.

KO IBIRORI BYO KWIZIHIZA UMUNSI W'UMUGANURA BYAGENZE MU MAFOTO

Minisitiri Uwacu ageze i Nyanza muri Sitade ahabereye ibirori yakiranwe urugwiro
Akigera kuri Sitade ya Nyanza, Minitiri Uwacu n'abanyacyubahiro bari bazanye babanje gusobanurirwa ibikorerwa mu karere ka Nyanza dore ko hari habaye imurikagurisha
Abanyacubahiro bageze mu byicaro, Uhereye i Buryo, Minisitiri w'uburinganire n'iterambere ry'umuryango, nyirasafari Esperance, Guverineri w'intara y'amajyepfo, Mureshyankwano, Minisitiri Uwacu Julienne , Mayor Erasme

Abanyeshuli bo mu ishuli ryisumbuye rya Nyanza bayoboye umuhango wo kuririmba indirimbo yubahiriza igihugu
Ntazinda Erasme, Umuyobozi w'akarere ka Nyanza niwe wahaye ikaze abashyitsi ndetse n'abatuye muri Nyanza bitabiriye ibirori byo kwizihiza umunsi w'umuganuraItorero urukerereza naryo ryasusurukije abari bitabiriye ibirori mu mbyino gakondoHabayeho umuhango wo kumurika no kwinikiza inyamboNgendahayo Alex watanze ubuhamya bw'ibyo yagezeho
Guverineri w'intara y'amajyepfo Mureshyankwano nawwe yageneye ubutumwa abanye Nyanza bugaruka ku byiza abanyarwanda baganura uyu mwakaBamwe mu baturage batishoboye nabo baraganujwe bahabwa inka abandi bahabwa za mituweli Minisitiri yahaye abana amata ku ruhimbi Umupfumu Rutangarwamaboko nawe yari yaje mu birori aherekejwe n'umugore we baherutse kurushingaUmuhanzi Rafiki nawe ari mu bataramiye abantu

ANDI MAFOTO MENSHIIbi birori byasojwe n'ubusabane,Minisitiri Uwacu n'abandi banyacyubahiro basangira ibigori n'abatuye muri Nyanza hizihizwa umuganura

from UKWEZI.COM http://ift.tt/2vBMHcV
via IFTTT