Umwami Muswati umukobwa we azamukosha inka 300

Umuhungu wabengutse umukobwa w’umwami Muswati III wa Swaziland mu muhango wagereranywa no gusaba irembo arasabwa inka 50 z’ibanza, umuhango bo bita ‘lobola’.

Igikomangoma Sikhanyiso ngo kumusaba ni ishyo ry’inka 300

Umuryango w’Umwami niwemera ko umukobwa wa Muswati III witwa Sikhanyiso arongorwa umuhungu witwa Mzwakhe Phiri azamukwa inka 300 nk’uko bivugwa n’ikinyamakuru City Press.

Igikomangoma Sikhanyiso niwe mukobwa mukuru wa Muswati wo ku mugore we wa mbere Inkhosikati LaMbikiza. Yize mu Bwongereza, muri US no muri Australi. Afite impamyabumenyi ya master’s mu byitwa Digital Communication.

Mzwakhe Phiri ni umusore w’imyaka 30 akaba n’umuhungu w’ibwami muri Malawi. Hari amakuru avuga ko abanyaMalawi baba muri Swaziland basabye gutanga ku nka zabo ngo babone iyi nkwano.

Phiri nawe ariko yavukiye muri Swaziland nubwo sekuru akomoka mu bami bo muri Malawi.

Uyu musore ngo azasabwa by’ibanze kugeza inka 50 kwa Muswati ngo ase n’ufungura ibiganiro byo gusaba uyu mukobwa nawe w’imyaka 30.

Muswati ubwe niwe uzagena neza umubare w’inka zizakobwa umwana we ariko ngo ntizishobora kujya munsi ya 300.

Phiri yahoze ari umukinnnyi wa Basketball muri Mozambique, mu Butaliyani no muri Finland.

Prince Thumbumuzi umuvandimwe wa Muswati III yavuze ko umwami atazanga ko umukobwa we ashyingirwa muri rubanda rusanzwe, ariko ngo nibura inka 300 nizo zatuma Umwami Sobhuza (Se wa Muswati) aho aryamye mu mva yihindukiza.

UMUSEKE.RW

from UMUSEKE http://ift.tt/2xoh1dj