Umuganura ni umuhango w’amateka wo gusangira no kwishimira umusaruro w’umwaka. Abishima ni abawubonye, hari abatarawubonye ariko babifashwamo n’abandi nabo bakishima cyane. Kwa Musanabera Belancille umukeucuru w’incike niho Umudugudu atuyemo wizihirije uyu munsi, hari ibyo bishimiraga….
Musanabera imbere y’iwe abashyitsi bari bugufi kumugeraho ngo bishimane nawe baganure
Atuye mu mudugudu wa Nyarurembo, Akagali ka Nyakabanda, Umurenge wa Niboye muri Kicukiro, iwe uyu munsi hari abantu bari hagati ya 50 na 80 baturanye nawe, wari umunsi w’ibyishimo kuri bo no kuri we.
Musanabera ni umukecuru udafite aho avana, abana n’abuzukuru be bato. Umuganura wabo wari ushingiye kwishimira inzu ye yavuguruwe kuko yari ishaje cyane igiye kumugwaho, ikavugururwa n’abaturanyi be.
Inzu ye yubatswe mu 1962, yari ishaje cyane mu bihe bishize, nta bushobozi bwo kuyisana, nta mazi, nta mashanyarazi. Ubuzima bwari bumugoye cyane.
Eduard Mudahinyuka uyobora Umudugudu wa Nyarurembo yavuze ko nk’abaturage b’Umudugudu mu myaka ibiri ishize bahize guhindura ubuzima bw’uyu mukecuru, nibura uko nabo bashoboye.
Ku ikbitiro, mu 2015 inzu ye yari ishaje cyane bayishyizemo amashanyarazi, ntibyari bihagije…Bashatse abo bafatanya.
2016 batangira kuyisana, bayubakira igipangu gikwiriye bayishyiramo amazi. Imirimo yose yarangiye mu ntangiriro z’uyu mwaka.
Eduard Mudahinyuka avuga ko imirimo yose yatwaye miliyoni ebyiri n’ibihumbi magana abiri, yatanzwe igice kinini n’abaturage, ikipe ya Mulindi FC na Koperative Ubumwe yahaye amazi Belancille.
Uyu munsi rero ngo wari uw’ibyishimo no kuganurira hamwe uyu musaruro mwiza bagezeho.
Ibi kandi ngo bizakomeza kuko bafite abandi babyeyi babiri bafite ibibazo nk’ibi nabo bazafasha mu bihe biri imbere.
Umunyabanga nshingwabikorwa w’Umurenge wa Niboye Jean Marie Vianney Havugarurema yashimye igikorwa cy’abaturage ba Nyarurembo kandi abasezeranya ko ubuyobozi bw’Umurenge buzabafasha no mu bindi nk’ibi.
Belancille Musanabera uri hagati y’imyaka 70 na 80 we amagambo macye yavuze ni ay’ibyishimo, gushimira abaturanyi bakoze ibi, gushimira Imana yabahaye uwo mutima no kubasabira umugisha.
Abari hano basangiye ibyo bateganyije birimo amafunguro ya Kinyarwanda, ababyeyi bazanye impano zinyuranye zipfunyitse mu biseke baziha Musanabera.
Umwana w’umukobwa w’imyaka 12 witwa Uwayezu Famille wari waje muri ibi birori yabwiye Umuseke ko ababyeyi be bamubwiye Umuganura wari umuhango wo kwishimira umusaruro weze mu buhinzi, ariko ubu ari n’umunsi wo kwishimira ibindi byagezweho bitari mu buhinzi gusa.
Bamaze gusangira ku byo bateguye bacinye akadiho barishima biratinda maze bugorobye barikubura barataha.
Ng’uko uko Umuganura wagenze kwa Musanabera wasigaye yasabwe n’ibyishimo…
Iwanyu aho muri wagenze neza?
Ababyeyi binjiranye ibiseke by’impano bazaniye Musanabera kuri uyu munsi w’Umuganura
Basangiye amafunguro ya Kinyarwanda yateguwe
Barishimira kandi amazi meza ari mu rugo rw’uyu mubyeyi atarigeze ahaba mbere
Inzu ye yari yarubatswe mu 1962 barayisannye mu bushobozi bwabo barayikomeza banayibakira urugo rukwiriye (reba ku ifoto ababyeyi binjira)
Edouard Mudahinyuka uyobora Umudugudu wa Nyarurembo avuga ko iki gikorwa bari barahize kugikora, bakaba bishimiye kugisohoza
Jean Pierre NIZEYIMANA
UMUSEKE.RW
from UMUSEKE http://ift.tt/2vi9XBf
No comments:
Post a Comment