Tanzania: HCR irashinjwa kubuza impunzi z’Abarundi gutaha ku bushake

Ishami ry’Umuryango w’Abibumbye ryita ku Mpunzi, HCR, rirashinjwa kubuza impunzi z’Abarundi 8,000 muri Tanzania gutaha ku bushake bwazo kuva muri Nyakanga 2017.

Iyi nkuru iravuga ko kuri uyu wa kane ushize, itariki 24 Kanama 2017, minisitiri w’umutekano wa Tanzania, Nchemba Mwingulu, yahaye HCR iminsi 7 yo gutegura uko izi mpunzi 8,000 zishaka gutaha ku bushake zizataha.

Minisitiri Nchemba yavuze ko HCR igomba guhita itangira gutegura ibikenewe ngo izi mpunzi zitahe kandi mu mutekano usesuye, kuko zikomeje gusaba gutaha ari nyinshi.

Yasobanuye ko mu mpera za Nyakanga 2017, impunzi z’Abarundi zisaga 5,000 zari zisigaye mu nkambi ziri mu burengerezuba bwa Tanzania, zagaragaje ubushake bwazo bwo gutaha iwabo ku bushake nyuma y’umuhamagaro uheruka wa perezida Magufuli wasabye impunzi gusubira iwabo zikagira uruhare mu kubaka igihugu cyazo. Ibi perezida Magufuli akaba yarabivuze nyuma y’uko perezida Nkurunziza nawe asabiye impunzi z’Abarundi gutaha ubwo yari yagiriye uruzinduko muri Tanzania.

Muri Tanzania, nk’uko iyi nkuru y’urubuga Burundi AGNews ikomeza ivuga, ngo bamwe mu bakozi ba HCR babuza impunzi z’Abarundi gutaha bazisaba kubanza gutegereza inama ziteganyijwe mu Muryango w’Abibumbye mu kwezi gutaha kwa Nzeri 2017, aho ngo biteguye imyanzuro ishobora kuzifatirwamo itandukanye ku Burundi.

Uru rubuga rukaba ruvuga ko kuva mu 2015 abakozi benshi baturuka mu burengerazuba bw’isi bakorera HCR bagira uruhare mu kitwa mu Gifaransa, Guerres Géopolitique et humanitaire, ugenekereje mu Kinyarwanda ikaba ari intambara ya dipolomasi ishingiye ku miterere y’ibihugu, aho ngo barwanya u Bushinwa n’u Burundi mu karere k’Ibiyaga Bigari.

Kuri aba banyaburayi rero, ngo umubare w’impunzi z’Abarundi ntukwiye kugabanyuka kuko ngo bishobora kugabanya uburemere bw’urwitwazo muri iyo ntambara ngo ihuriyemo ibihugu byinshi byo mu burengerazuba mu Biyaga Bigari.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com



from bwiza http://ift.tt/2vvkc1n
via IFTTT

No comments:

Post a Comment