RDB yatangaje ko Kwita izina 2017 bizitabirwa n’ibyamamare by’i Hollywood

Mu gihe habura amasaha macye ngo ku itariki 01 Nzeri mu Kinigi mu Karere ka Musanze habere ku nshuro ya 13 umuhango Kwita Izina ingagi, umuyobozi w’urwego rw’igihugu rushinzwe kwihutisha iterambere (RDB) Clare Akamanzi yatangaje ko uyu muhango uzitabirwa n’ibyamamare binyuranye bikina za Filime muri Nigeria na Leta zunze ubumwe za America.

Umuyobozi wa RDB Clara Akamanzi yavuze ko Kwita izina 2017 izaba idasanzwe.

Clara Akamanzi yavuze ko ibintu by’ingenzi bidasanzwe bizagaragara mu kwita izina 2017 ugereranije n’indi myaka yashize bishingiye ahanini kubadazita amazina badasanzwe.

Ati “Dufite urutonde rwiza rw’abantu bazita amazina abana b’ingagi. Muri abo harimo ibyamamare bya sinema byo muri Hollywood (USA) no muri Nigeria, harimo abaherwe (Billionaires) bakomeye, n’abandi bamamaye mu kurengera ibinyabuzima.”

Akandi gashya ngo ni uko urubyiruko narwo rwahawe umwanya muri uyu muhango, kuko ngo narwo ruzagaragara rwita abana b’ingagi amazina.

Akamanzi yavuze ko bahisemo urubyiruko mu rwego rwo gukangurira abakiri bato hakiri kare ibijyanye no kubungabunga urusobe rw’ibinyabuzima (conservation).

Ibi, Clare Akamanzi yabigarutseho kuri uyu wa kabiri mu gusoza ibiganiro byari bimaze iminsi ibiri byiga ku bijyanye no kubungabunga urusobe rw’ibinyabuzima n’ibidukikije byaberaga i Kigali.

Bamwe mu bari bitabiriye ibi biganiro nabo bavuga ko urubyiruko nk’u Rwanda rw’ejo ngo ruba rukwiye kugira uruhare mu kurengera ibidukikije kuko ngo arirwo bifitiye akamara cyane, kuko arirwo rukeneye kubaho mu bihe bizaza.

Imanishimwe Ange wari witabiriye ibi biganiro yagize ati “Urubyiruko rugomba kumva ko ibibazo by’igihugu bibareba . Urubyiruko rugomba guha agaciro ibinyabuzima kuko babana nabyo mu buzima bwa buri munsi. Ahubwo banatangire gushaka imishinga igamije kubibungabunga kandi ibyara inyungu.”

Gusa ngo ku babyiruka hari imbogamizi nyinshi zirimo no kuba basabwa kubungabunga ibintu batarabona kandi biba bibegereye.

Uwitwa Alexis Ndemezi ati “Abenshi usanga babwirwa kubungabunga ibidukikije ariko batabasha kubigeraho ngo babibungabunge babizi. Ugasaga nk’umwana abwirwa kubungabunga ingagi azi ingagi yo muri sinema yitwa Kikongo gusa kandi mu Rwanda zihari.”

Basabye ko kubungabunga ibinyabuzima byashyirwa muri gahunda z’amasomo yigishwa abanyeshuri kandi abakeneye gusura ibinyabuzima u Rwanda rufite bakajya borohererezwa.

Abitabiriye ibi biganiro by’iminsi ibiri biganjemo urubyiruko rwo muri za Kaminuza.

Alexis Ndemezo umwe mu bitabiriye ibi biganiro avuga ko byo baganiriye mu matsinda ngo hari imbogamizi y’uko abaturage batagera kubyo basabwa kubungabunga.

Callixte NDUWAYO
UMUSEKE.RW

from UMUSEKE http://ift.tt/2wGUvi5