Mayor wa Nyarugenge yasuye aho umuturage yariwe n’ingona

Kuri uyu mugoroba Kayisime Nzaramba umuyobozi w’Akarere ka Nyarugenge yasuye Umurenge wa Mageragere mu gace karimo n’Akagari ka Kavumu aho kuwa gatandatu ushize ingona yafahe umugabo ikamwica yaje kuvoma mu mugezi wa Nyabarongo. Yihanganishije abagize ibi byago anabizeza ko ikibazo cy’amazi meza kiri gukemurwa.

Umuyobozi w’Akarere ka Nyarugenge (wambaye ikanzu) i Mageragere kuri uyu mugoroba

Uyu muyobozi hamwe n’abandi bari kumwe babanje kuzenguruka ahanyuranye muri aka gace ahari gucukurwa amariba y’amazi yo mu bukata mu tugari twa Kavumu (ho ryaruzuye ubu batangiye kuvoma) n’ahandi.

Ku gice cyegereye gereza ya Mageragere ku musozi uri hejuru ya Nyabarongo naho hari kubakwa ivomero rifatiye ku miyoboro ijyana amazi muri gereza ya Mageragere.

Muri aka gace ubu hamaze kuzura amavomero ane mu tugari twa Kavumu na Ntungamo.

Ahagana saa kumi n’igice  uyu muyobozi yatangiye inama n’abaturage bo mu tugari twa Kavumu, Ntungamo na Runzenze.

Yabahaye ubutumwa bwo kubihanganisha ku bo ingona iherutse gutwara uwabo, anabizeza ko hari ibiri gukorwa ngo nk’ibi bitazongera.

Umupfakazi w’umugabo watwawe n’ingona mu kwezi kwa gatatu yashimiye ubuyobozi ko bwamufashije gushyingura umugabo we kandi ngo n’umugabo uherutse gupfa nawe yashyinguwe n’ubuyobozi.

Usibye ikibazo cy’amazi kitarakemurwa, bijejwe ko n’abataragerwaho n’amashanyarazi azabageraho vuba kuko umuyobozi wa REG azabasura bakabiganiraho.

Abaturage bo mu tugari twa Ntungamo na Kavumu kandi bamubwiye ko nta site bafite yo kubakamo inzu ziciriritse, ikibazo banatinzeho bizezwa ko kizaganirwa kigashakirwa umuti.

Bamwe mu baturage bari baje kumva ubutumwa abazaniye

Yabijeje ko ikibazo cy’amazi kiri gukemurwa ngo ntibazongera kuribwa n’ingona

UMUSEKE.RW

from UMUSEKE http://ift.tt/2w2aff6