Kubera ko ingagi ziri muri Parike y’ibirunga zigenda ziyongera hakavuka indi miryango, Ikigo cy’igihugu gishinzwe iterambere (RDB) kiritegura ko mu myaka 6 iri imbere kizaba kimaze kongera icyanya cy’ingagi kugira ngo zirusheho kubaho mu bwisanzure kuko ngo iyo zitisanzuye zicana.
Ibi biganiro byitabiriwe n’abantu benshi.
Kuri uyu wa mbere, i Kigali mu Rwanda hatangiye ibiganiro mpuzamahanga byiga ku kubungabunga urusobe rw’ibinyabuzima n’ibidukikije (conservation), ndetse bitegura umuhango wo kwita izina uzaba kuri uyu wa gatanu tariki 01 Nzeri.
RDB ivuga ko mu myaka 12 ishize u Rwanda rwita amazina ingagi, ubu ngo rumaze kwita ingagi 280, gusa muri rusange rukaba rufite ingagi hafi 400.
Mutangana Eugene ushinzwe amaparike y’igihugu muri RDB, avuga ko iyi nama iri mu rwego rwo kuzamura kubungabunga za parike z’u Rwanda cyane cyane ko ariho ibinyabuzima by’igihugu bisigaye cyane, ndetse zikaba ari nazo gicumbi cy’ubukerarugendo bufitiye akamaro kandinini ubukungu bw’igihugu.
Mutangana avuga ko imbogamizi za parike zifite ahanini ari ubwiyongera bw’abaturage buri hejuru bituma abegeranye na za parike rimwe na rimwe abantu bangiza Parike cyangwase inyamanswa zigasohoka zikabasanga aho batuye.
Mutangana avuga ko zimwe mu ngamba bafashe mu rwego rwo guhangana n’iyi mbogamizi cyane cyane kuri Parike y’ibirunga, harimo kongera icyanya cy’ingagi.
Ati “Izi ngagi uko ziyongera aho ziri ntabwo hiyongera kandi uko zikomeza kuba nyinshi, uko zegerana mu miryango ingabo zirarwana, iyo zirwanye inesheje ishobora kwica indi, iyo iyinesheje yica ibyana bito byo mu muryango wa yayindi yishe, kuri twebwe ni igihombo. Uko zigenda ziyongera niko zikenera n’aho kuba. Ni muri urwo rwego dutekereza ko dukomeje kwagura zabona ubuhumekero.”
Mutangana Eugene ushinzwe amaparike y’igihugu muri RDB aganira n’abanyamakuru.
Mutangana avuga ariko ko bizakorwa mu buryo bizaba bitirengagiza imibereho y’abaturage, ngo bizaba bigamije gutanga ubwinyagamburiro ku ngagi ariko binatanga inyungu ku baturage.
Bumwe mu buryo bashobora gukoresha ngo harimo kugurira abaturage bakimuka cyangwa gukodesha ubutaka bwabo ntibimuke.
Agira ati “Ni gahunda ishobora gutwara igihe kirekire, ni ikintu turimo gutegura uhereye uyu munsi, ariko turizera ko hagati y’imyaka ine n’itandatu (4-6) tuzaba twabigezeho.”
Umwe mubatanze ikiganiro, Dr Tara Stoinsky uyobora ikigega “Dian Fossey Gorilla Fund International” avuga ko ubuke bw’ingagi zo mu misozi zisigaye ku isi dore ko ari hafi 900 ariyo mbogamizi ikomeye kuri ubu bwoko bw’inyamanswa.
Dr Tara Stoinsky aganira n’abanyamakuru.
Dr Tara ashima u Rwana uburyo rukomeje kuba intangarugero muri gahunda zo kurengera urusobe rw’ibinyabizima biri gucika ku isi by’umwihariko ingagi.
Mu bindi bifatwa nk’umusaruro w’iyi nama, ni itegeko ryo kubungabunga urosobe rw’ibinyabuzima riri gutegurwa mu Rwanda kugira ngo rijye ku rwego rumwe n’andi mategeko yo mu karere, ariko kandi ribashe guhana bigaragara abica ibinyabuzima cyane cyane ibiri gucika ku isi.
Kugeza ubu Parike y’ibirunga yinjiriza u Rwanda miliyoni 17 z’amadolari ya Amerika ($) buri mwaka, muriyo 92% akaba ava mu gusura ingagi.
Kureba amafoto menshi kanda HANO.
Ibi biganiro byitabiriwe n’abantu bavuye mu bihugu bitandukanye.
Ibiganiro nk’ibi biraba ku nshuro ya gatatu.
Minisitiri Dr Vincent Biruta yashimiye abateguye ibi biganiro.
Clare Akamanzi uyobora RDB yavuze ko ibiganiro nk’ibi bitanga umurongo wo gusigasira ingagi.
Dr Tara Stoinsky uyobora ikigega “Dian Fossey Gorilla Fund International” atanga ikiganiro.
Venuste KAMANZI
UMUSEKE.RW
from UMUSEKE http://ift.tt/2vw9WWx
No comments:
Post a Comment