Imyaka yo kwiga kaminuza mu Rwanda igiye kugabanywa

Mu gihe uwigaga kaminuza yahabwaga impamyabumenyi y’uko yarangije icyiciro cya kabiri cyayo (Bachelors Degree), nyuma y’imyaka ine, guhera mu mwaka utaha izaba itatu ku biga kaminuza y’u Rwanda.

Izi mpinduka zatangajwe n’Umuyobozi wungirije wa Kaminuza y’u Rwanda ushinzwe ubushakashatsi n’amasomo, Prof Nelson Ijumba mu kiganiro yagiranye na The New Times.

Iyi myaka itatu izatangira mu mwaka utaha ku biga amasomo y’ubumenyamuntu n’imbonezamubano  muri kaminuza y’u Rwanda.

Nubwo bimeze gutya ariko hari amasomo amwe n’amwe bitareba, ayo ni aya siyansi mu mashami amwe n’amwe.

Yagize ati “ Ubu turi mu byo guhuza ibintu. Ndetse twabonye ko amwe mu masomo ashobora gutangwa mu gihe cy’imyaka itatu, guhera mu mwaka w’amashuri utaha. Amasomo yose y’imbonezamubano azatangwa mu gihe cy’imyaka itatu, ndetse n’amenshi mu ishami rya siyansi, ariko hatarimo ay’ubwubatsi buhanitse (architecture, engineering) n’ubuvuzi(medicine).”

Dr Ijumba (wunamye) ari kumwe na Prof Lwakabamba wabaye Minisitiri w’Uburezi

Uretse izi mpinduka ku bijyanye n’imyaka, muri iyi kaminuza hazaba n’izijyanye no kugabanya umubare wa koleji.

Ni muri urwo rwego koleji zari 6 zizagirwa 5. Ibyo bizashyirwa mu bikorwa havangwa koleji yabarizwagamo amasomo y’ubugeni n’imbonezamubano azavangwa n’ay’iya koleji yigisha ubucuruzi n’ubukungu. Ibyo ngo bizakorwa kubera ko amasomo yigishwamo afite byinshi ahuriyeho.

Izi mpinduka kandi ziravugwa na hamwe mu mashuri makuru na za kaminuza byigenga mu Rwanda.

Izi mpinduka zo kugabanya imyaka biravugwa ko zamaze gutangira ku biga itangazamakuru muri kaminuza y’u Rwanda.  Aba banyeshuri biga mu bujyanye n’iyo gahunda bamaze kugera mu mwaka wa kabiri, bakaba basigaje umwe.

Si ubwa mbere izi mpinduka zigiye gutangira muri kaminuza n’amashuri makuru mu Rwanda, kuko muri Mount Kenya na KIM bari basanzwe biga imyaka itatu mu mashami amwe n’amawe.

Uyu mwaka kaminuza y’u Rwanda izaba ifite abanyeshuri basaga ibihumbi 23. Mu mwaka wa mbere hazatanira  abasaga 5000 baziga siyansi, abaziga  ay’imbonezamubano bazaba ari 1000.

Kanda hano ujye ubona amakuru yihuse kandi kugihe kuri Facebook no kuri twitter

Ntakirutimana Deus/bwiza.com

from bwiza http://ift.tt/2whwVpE
via IFTTT