Myugariro w’ikipe y’igihugu Amavubi Fitina Ombolenga ubu nta kipe afite nyuma yo kutumvikana na UCAM Murcia yo muri Espagne yakoragamo igeragezwa. Yagarutse mu Rwanda kurangiza ibiganiro na AS Kigali, gusa na APR FC iri mu zimwifuza.
Ombolenga Fitina wagarutse mu Rwanda arifuzwa muri AS Kigali na APR FC
Abakinnyi b’abanyarwanda bari bamaze iminsi 20 muri Espagne bakora igeragezwa muri Católica de Murcia Club de Fútbol yo mu kiciro cya gatatu. Aba basore bagiye bazi ko bagiye gusinya amasezerano ariko basabwa kubanza gukora igeragezwa.
Bivugwa ko basabwe gukorera imyitozo mu ikipe y’ingimbi mu mezi atandatu ari imbere badahembwa, bagaragaza urwego rwiza bakabona guhabwa amasezerano y’abanyamwuga.
Ntibishimiye impinduka zabatunguye bahitamo kugaruka mu Rwanda. Fitina Ombolenga wageze mu Rwanda kuri uyu wa gatandatu tariki 26 Kanama 2017 biteganyijwe ko ahita asubukura ibiganiro na AS Kigali yamwifuje kuva muri Kamena.
Gusa na APR FC yiteguye gutangira kuganiriza uyu musore w’imyaka 23 kuko ifite ikibazo mu bwugarizi. Nyuma yo kumvikana na Dennis Rukundo wa KCCA ukina inyuma ku ruhande rw’iburyo ariko akaba ashobora no gukina mu mutima wa ba myugariro, ngo barifuza kumwongeraho Ombolenga Fitina ngo babe abasimbura ba Faustin Usengimana, Ngandu Omar na Rusheshangoga Michel batakaje muri iyi mpeshyi.
Aya makipe yitegura umwaka mushya w’imikino arashaka abakinnyi byihuse kuko azabakenera mu gikombe cy’Agaciro Development Fund 2017.
Gahunda y’agateganyo y’imikino y’Agaciro
Tariki ya 9 Nzeri 2017
- As Kigali vs APR FC 13:00
- Rayon Sports vs Police 15:30’
Tariki ya 13 Nzeri 2017
- As Kigali vs Rayon Sports 13:00’
- APR FC vs Police 15:30’
Tariki ya 16 Nzeri 2017
- Police vs As Kigali 13:00’
- Rayon Sports vs APR FC 15:30’
Ombolenga ni umwe mu basore Amavubi asanzwe agenderaho
Roben NGABO
UMUSEKE
from UMUSEKE http://ift.tt/2vB9LIJ
No comments:
Post a Comment