Mu bihembo ‘ASFA’ bitangirwa muri Uganda, Abanyarwanda bashobora kwiyongera

Mu mwaka ushize wa 2016 Abanyarwanda batandatu bitabiriye igikorwa cyo guhemba abitwaye neza mu by’imideli muri Afurika kitwa ‘Abryanz Style and Fashion Awards (ASFA)’. Abakurikiranira hafi iby’imideli mu Rwanda bemeza ko intambwe imaze guterwa ishimishije ku buryo umubare w’Abanyarwanda bazitabira ibi bihembo bitangwa ku rwego rwa Afurika ushobora kuziyongera.

Mu muhango wo gutangaza itariki ibi bihembo bizatangirwaho

Abategura iki gikorwa cyo gushimira abitwaye neza mu by’imideli muri Afurika kitwa ‘Abryanz Style and Fashion Awards (ASFA)’ baratangaza ko ku wa 08 Ukuboza uyu mwaka ibi bihembo bizatangwa ku nshuro yabyo ya gatanu.

Umwaka ushize wa 2016, ibi bihembo byitabiriwe n’Abanyarwanda batandatu barimo Friday James , Kate Bashabe, Moses Turahirwa, Nib Studios, Umuhoza Milly, Jean de Dieu Ntabanganyimana na Utuje Claudine wanegukanye igihembo cy’uzi gusiga neza ibirungo  muri East Africa.

Kuva mu mwaka wa 2015 ni bwo Abanyarwanda batangiye kwitabira ibi bihembo. Abakurikiranira hafi iby’imideli mu Rwanda bemeza ko uyu mwaka bishobora kuzitabirwa n’Abanyarwanda benshi kuko uko imyaka ishira uru ruganda rurushaho gutera imbere.

Ubwo yatangazaga ku mugaragaro amatariki ibi bihembo bizatangirwa, Brian Ahumuza watangije ibi bihembo, yavuze ko  uyu mwaka  hari udushya twinshi bateguye.

Ati “Twishimiye cyane ko igitekerezo twatangije mu myaka itanu ishize cyakuze, ubu twiteguye kwishimira imyambaro ya Kinyafurika n’abahanga imideri muri rusange bakomeza guca inzira mu ruganda rw’imideri.

Uyu mwaka twiteze ko igikorwa kizaba cyagutse cyane ugereranyije n’imyaka yabanje kandi twiteguye kwakira  ibyamamare mu mideri biturutse ku migabane itandukanye.”

Umwihariko w’ibi bihembo byahawe insanganyamatsiko igira iti ‘Fashion Takeover’ muri uyu mwaka ni uko hiyongereyemo ibyiciro bibiri (fashion Entrepreneur of the year Uganda  na Fashion Entrepreneur Africa).

Ibi bihembo bya ‘Abryanz Style and Fashion Awards’ byatangiye gutangwa muri 2013 i Kampala muri Uganda, byatangiye ari ibyo ku rwego rwa Uganda nyuma biza kuba ibyo mu karere ka Africa y’Uburasirazuba none ubu biri ku rwego rwa Africa.

Abasanzwe babitegura bavuga ko intego yabo ari ugufasha Abanyafurika cyane cyane abo muri Afurika y’Iburasirazuba bakora akazi gafite aho gahuriye n’imideri kumenyekana no kubaha icyubahiro.

Bamwe mu banyamideli bitabiriye ibirori byo gutangaza igihe ASFA izabera (ibumoso ni Umunyarwandakazi)

Abategura ibi birori bagaragaje udushya turi muri uyu mwaka

Abakunzi b’imideli na bo bari baje muri iki gikorwa

Abanyamideli ngo biteguye kuzaseruka neza muri ibi birori bizaba mu Ukuboza

Robert KAYIHURA
UMUSEKE.RW

from UMUSEKE http://ift.tt/2tYhSyr