Rubavu: Abo mu yindi mitwe ya politiki barakataje bamamaza umukandida wa FPR/INkotanyi, Paul Kagame

Abanyamuryango ba FPR Inkotanyi bo mu mirenge itandukanye igize akarere ka Rubavu , bakomeje ibikorwa byo kwamamaza umukandida wabo, Paul Kagame bafatanije  n’abahagarariye indi mitwe ya politiki itandukanye igakoreramo.

Ubwo bamamazaga mu murenge wa Busasamana, abanyamuryango b’imitwe ya Polike nka PL, PSD, PDI bagaragarije imbere y’imbaga  y’abanyamuryango ba FPR Inkotanyi babarirwa mu bihumbi ko nabo bashyigikiye umukandida Paul Kagame, ko bamubonamo ubushobozi, imiyoborere myiza, gukunda igihugu n’iterambere kandi nabo ari byo baharanira.

Umuyobozi wa PSD mu karere ka Rubavu, Zirarushya Venant,  ati ”Inteko rusange ya PSD ku rwego rw’igihugu yemeje ko ishyigikiye umukandida watanzwe n’Umuryango FPR Inkotanyi , kuko ashoboye.

Mu myaka yose yayoboye u Rwanda ntiyigeze adutandukanya kuko tutari muri FPR, tubona amahirwe angana n’abandi Banyarwanda bose, haba mu guhabwa imirimo, ndetse no mu nzego nkuru zigihugu zifata ibyemezo udusangayo.

Abanyamuryango bacu barorojwe muri gahunda ya Girinka , na VUP yabagezeho, yazanye ubumwe n’ubwiyunge mu banyarwanda…,mu gihe yaramuka atsinze amatora, twese nk’Abanyarwanda tuzasangira ayo mahirwe, Ni umugabo ugira ukuri ubushishozi no kureba kure”.

Imbere y’imbaga y’abanyamuryango ba FPR, aba bayoboke b’indi mitwe ya Politiki babasabye bose kuzatora umukandida Paul Kagame, kuko ari we bakesha agaciro igihugu gifite mu ruhando mpuzamahanga.

Banashimira abaturage bo mu murenge wa Busasamana babimburiye abandi Banyarwanda mu gusaba Inteko Inshinga Amategeko ko yahindura ingingo ya 101 mu Itegeko Nshinga, yatumye Paul Kagame yongera guhabwa uburenganzira n’icyizere cyo kwiyamamariza kuyobora u Rwanda muri iyi manda y’imyaka irindwi.

Ibikorwa byo kwamamaza umukandida wa FPR birakomeje mu mirenge yose igize akarere ka Rubavu, aho mu mirenge iki gikorwa cyagiye kibera iyi mitwe ya Politiki yakomeje kugaragaza uruhare rwayo mu gushyigikira umukandida wa FPR kimwe n’ahandi mu gihugu hose aho umukandida Paul Kagame yiyamamaza, baba bahari.

Kanda hano ujye ubona amakuru yihuse kandi kugihe kuri Facebook no kuri twitter

Magarambe Theodore/Bwiza.com

 

from bwiza http://ift.tt/2twoys7
via IFTTT