Ibishya Ku Bisasu muri Leta zunze ubumwe z’Amerika

Inzego z’umutekano za Leta zunze ubumwe z’Amerika zatahuye udupaki turimo ibisasu twohererejwe abanyapolitiki batandukanye tunyuze mu iposita. Kugera ubu, abo twari tugenewe ni aba: Barack Obama, wayoboye igihugu kuva mu kwezi kwa mbere 2009 kugera mu kwa mbere 2017. Hillary Clinton, umufasha wa Perezida Bill Clinton wayoboye igihugu kuva mu 1993 kugera mu 2001. Yabaye  senateri kuva mu 2001 kugera mu 2009, na minisitiri w’ububanyi n’amahanga wa 67 kuva mu 2009 kugera mu 2013. Yatsinzwe na Perezida Donald Trump mu matora y’umukuru w’igihugu mu 2016. Eric Holder, minisitiri w’ubutabera wa 82 kuva mu 2009 kugera mu 2015, Andrew Cuomo, guverineri wa leta ya New York, John Brennan, wayoboye ikigo cy’iperereza CIA kuva mu 2013 kugera mu 2017. Abandi ni Depite Debbie Wasserman Schultz ukomoka muri leta ya Florida, Depite Maxine Waters ukomoka muri leta California na George Soros, umunyemari w’umuherwe utuye mu mujyi wa New York. Udupaki turimo ibisasu twoherejwe kandi no mu nyubako z’ibigo by’itangazamakuru bya CNN na Time Warner Center ziri mu mujyi wa New York. Urwego rushinzwe kurinda abategetsi n’abahoze ari abakuru b’igihugu, Secret Service, rwatangaje ko udupaki turimo ibisasu twari twohererejwe Barack Obama na Hillary Clinton twatahuwe tutaragera aho batuye. Ba Clinton baba mu mujyi wa New York, naho ba Obama baba mu murwa mukuru Washington D.C. Abohereje ibi bisasu ntibaramenywa. Mu nzego z’umutekano zirimo zikora amaperereza harimo Secret Service, polisi y’umujyi wa New York, n’ikigo cy’ubugenzacyaha FBI.

from Voice of America https://ift.tt/2PlqttF
via IFTTT