Suede: Umunya-Suede ukomoka mu Rwanda agiye kuburanishwa ku ruhare rwe muri jenoside

Umunyarwanda, Theodore Tabaro, ufite n’ubwenegihugu bwa Suede, muri Nzeri azatangira kuburanishwa n’Urukiko Rudasanzwe rwa Stockholm ku ruhare ashinjwa muri jenoside yakorewe Abatutsi mu Rwanda nk’uko byatangajwe n’urukiko kuri uyu wa Gatatu ushize.

Theodore Tabaro w’imyaka 49, ashinjwa ibyaha by’ubwicanyi, kugerageza kwica, gufata ku ngufu no gushimuta Abatutsi. Ibyaha ashinjwa ngo akaba yarabikoze hagati y’itariki 09 kugeza ku itariki 31 Gicurasi mu zahoze ari Segiteri Nyakanyinya na Mibirizi, mu majyepfo y’uburengerazuba bw’u Rwanda nk’uko inyandiko AFP yabashije kubona zibigaragaza.

Tabaro, izina rye rigaragara ku rutonde rwashyizwe ahagaragara n’ubuyobozi bw’u Rwanda rw’abantu bashakishwa kubera uruhare rwabo muri jenoside, avugwaho kuba yaragize uruhare mu gutegura, kwinjiza abantu mu mitwe y’ubwicanyi no kububashishikariza ndetse no kubushyira mu bikorwa.

Kuwa 09 Mata 1994, ahitwa Winteko, ngo Tabaro yagize uruhare mu iyicwa ry’abasivili benshi no gufata ku ngufu abagore n’abakobwa. Kuwa 13 Mata, ngo yagize uruhare mu gitero cyagabwe ku ishuri rya Nyakanyinya, aho ngo amagana y’abantu, harimo abana benshi, biciwe abandi benshi bagakomeretswa na za grenades, amasasu n’ibyuma.Nyuma y’iminsi myinshi, ngo Tabaro yanagize uruhare mu gitero cyagabwe ku kiliziya muri Mibirizi.

Abashinzwe iperereza n’abashinjacyaha babajije abarokotse mu Rwanda, u Burayi, no muri Amerika ya Ruguru. Hagaragajwe byibuze abantu 36 bishwe na barindwi bafashwe ku ngufu. Abandi 30 barokotse n’abo mu miryango yabo bari mu batanze ikirego.

Nubwo ashinjwa ibyo byaha, Theodore Tabaro we arabihakana nk’uko umucamanza Hanna Lemoine yabitangarije AFP.

Theodore tabaro yatawe muri yombi mu Ukwakira 2016 asanzwe iwe ahitwa Orebro mu burengerezuba bwa Stockholm. Yageze muri Suede mu 1998, aba umuturage w’iki gihugu mu 2006.

 Mu 2014 na 2016, inkiko za Suede zahamije ibyaha abandi Banyarwanda babiri bari bafite ubwenegihugu bw’iki gihugu, Stanislas Mbanenande na Claver Berinkindi, zibakatira igifungo cya burundu.

Kanda hano ubone amakuru yihuse kandi ku gihe kuri Facebook no kuri twitter

 

Dennis Ns./Bwiza.com

 

from bwiza http://ift.tt/2xgEwb5
via IFTTT