Inzu zisaga 100 zubatswe mu buryo bunyuranyije n’amategeko mu Mirenge ya Runda, Rugarika na Gacurabwenge, mu karere ka Komonyi zizasenywa mu rwego rwo kubahiriza imiturire ikwiye.
Kamonyi, ni akarere gahana imbibi n’Umujyi wa Kigali na Muhanga ahasanzwe inzu zigezweho, hari no kuzamuka izindi. Muri aka karere haragana abaturage benshi bubakayo inzu zo guturamo ndetse n’iz’ibindi bikorwa bitandukanye.
Nubwo bimeze gutyo ariko hari bamwe mu baturage bahubaka inzu mu buryo buteye kwibaza. Bamwe bubaka mu ntoki ahatarakatwa imihanda n’ibindi byangombwa bisabwa ahantu ngo hubakwe. Hari kandi abaturage bubatse izo nzu zitemewe mbere no mu gihe cy’amatora ya perezida wa repubulika.
Ni muri urwo rwego iki kibazo cyahagurukije Guverineri w’Intara y’Amajyepfo, aka karere gaherereyemo, Mureshyankwano Marie Rose, ku wa Kane tariki ya 7 Nzeri 2017. Yageze ahubatswe izo nzu agirana inama n’abaturage n’abayobozi batandukanye muri aka karere.
Mureshyankwano yagaye abayobozi , anababwira ko hari ibitazihanganirwa.
Guverineri Marie Rose Mureshyankwano ari mu Murenge wa Runda, mu gikorwa cyo kureba uko imyubakire n’imikoreshereze y’ubutaka bihagaze.
Ati “Mumpe igisubizo, ndimo ndibaza impamvu ki tudashyiramo imbaraga mu gukumira, tugashyira imbaraga mu gukuraho ibyamaze kuzura. Kuko imbaraga twashyira mu gukumira ntibikorwe, nizo zagira ingaruka (risk) nkeya, kurusha kuza kubikuraho byamaze kuzura. Kuko nitubikuraho, inzu nituyisenya umuturage araba ahombye. Mwibwira ko umuturage iyo ahombye, leta yo iba idahombye? ….mwari kuba mwakumiriye, amafaranga y’umuturage ntapfe ubusa, bikarinda n’akajagari.”
Bamwe mu bayobozi bavuga ko usanga bamwe mu baturage barabananiye. Aha niho uyu muyobozi yahereye ababaza niba barananiranye babihakanira mu ruhame.
Abaturage bavuga ko hari bamwe mu bayobozi babasaba ruswa yitwa umuti w’ikaramu. Ariko hari n’abihisha ubuyobozi, nubwo Mureshyankwano atabyemera kuko ngo inzu itazamuka abayobozi batandukanye bahatuye batabizi.
Ku bijyanye na ruswa, mu Kagari ka Muganza mu Murenge wa Runda, haravugwa abayobozi barimo n’Umunyamabanga Nshingwabikorwa w’Akagari n’abo ku rwego rw’Umudugudu bafunzwe mu bihe byegereje amatora. Icyo gihe byavugwaga ko hari umuturage wubatse inzu abahaye amafaranga agera kuri miliyoni bakayagabana. Nyuma baje gufungurwa.
Muri aka gace kandi hari undi muturage wigeze gusabwa ibihumbi 400 ngo yemererwe kubaka. Yaje kuyabura kuko yari afite ibihumbi 300, bayanze agenda ayarya gahoro gahoro. Iyo nzu ya metero 9 kuri 7 yaje gusenywa amaze kuyisakara.
Ni iki kizakorwa kuri izo nzu?
Zimwe mu nzu zubatswe
Izi nzu zizasenywa, nkuko byemezwa n’Umuyobozi w’agateganyo w’akarere ka Kamonyi Tuyizere Thadee.
Mu minsi ishize yavuze ko ikizakorwa ari kubahiriza itegeko rijyanye n’imyubakire.
Ati “Uwubatse wese adafite ibyangombwa cyangwa uwubatse ahatarateganijwe, ubundi asabwa gukuraho inzu yubatse cyangwa ibindi bikorwa yakoze. Bose barandikiwe babwirwa ko ibyo bakoze Bitemewe. Twabasabye kubyikuriraho kubushake, iyo bitakozwe hajyaho ingufu za Leta, nicyo kigiye gukurikiraho kandi hamwe byaratangiye.”
Uyu muyobozi akomeza avuga ko abayobozi bagize uruhare muri ibi bikorwa nabo batazihanganirwa.
Ati “Igikurikiraho ni ugukurikirana umuyobozi umwe kuri umwe ku bijyanye n’inshingano afite n’ibyo atubahirije, ibyo navuga ko ari igikorwa gikomeza. Biragaragara ko hari uburangare bw’inzego zibanze cyane abegereye abaturage ku mudugudu ku kagari kuko iyo baba maso ntabwo zari kuzamuka ngo zigere hariya, bagombaga no kuba baratanze amakuru zigitangira abantu bakaba banasaba ko zivanwaho hakiri kare, buri wese agenda akurikiranwa bitewe n’uruhare yagize.”
Inama Njyanama y’aka karere yatangaje ko hari inzu 93 mu Mirenge ya Gacurabwengem Runda na Rugarika yubatswe mu bihe by’amatora ya perezida wa repubulika aherutse kuba. Ibi byagaragajwe muri raporo yatanzwe mu nama Njyanama y’akarere ka kamonyi yateranye tariki 30 Kanama 2017.
Muri rusange muri aka karere haravugwa inzu zigera ku 102 zubatse muri iyo mirenge zigomba gusenywa. Mu Murenge wa Runda ufatwa nk’Umujyi ukomeye w’aka karere ka Kamonyi habarurwa inzu 74 zigomba gusenywa.
Ku bitwikiriye ibikorwa by’amatora bakubaka izo nzu, Mureshyankwano yavuze ikizakorwa.
Ati “Ntabwo mu gihe cy’amatora ari igihe cyo gukora amakosa, cyangwa igihe cyo kurangara uri umuyobozi, ahubwo aba ari igihe cyo kuba hafi y’abaturage. Aho twasanze hubatswe mu kajagari, abayobozi bakavuga ko bari bahugiye mu matora ariko ruriya ni urwitwazo bakabaye barafashe ingamba kugira ngo ziriya nzu ntizijyeho[…]Na wa muyobozi warebereye akarangara, wirengagije hari izindi mpamvu, na we agomba guhanwa hakurikije imihanire y’abakozi ba Leta.”
Zimwe muri izi nzu zubatswe ahatagenewe kubakwa. Izindi zubatswe ahabugenewe ariko ntihifashishwa inyagombwa byemewe nk’amatafari ahiye, akoze muri sima n’ibindi. Hari kandi n’abagiye bubaka nta byangombwa, n’abitwikiraga ijoro bakubaka inzu nshya hafi y’aho batuye.
Imijyi ituriye uwa Kigali, yagombye guhagurukirwa ku rwego rw’igihugu mu bijyanye no kubakwamo. Kuko bidakozwe bishobora kuzatuma ikibazo cy’imiturire itanoze igaragara mu bice byatuwe kera mu mujyi wa Kigali, mu bice nka Biryogo, Gitega, Kimisagara, Muhima, Kangondo(Bannyahe) n’ahandi kigaragaza muri iyo mijyi, dore ko hamwe na hamwe hari ibimenyetso bibyerekana.
Kanda hano ubone amakuru yihuse kandi ku gihe kuri Facebook no kuri twitter
Ntakirutimana Deus @Bwiza.com
from bwiza http://ift.tt/2xgB3cD
via IFTTT
No comments:
Post a Comment