Rusizi: Abana batawe n’ababyeyi barasaba ko uburenganzira bwabo bwubahirizwa

Abana batabwa n’ababyeyi barasaba ubuyobozi kugira icyo bukorera ababyeyi babo gito, uburenganzira bw’abo bwo kurerwa na bo bukubahirizwa.

Bamwe muri aba bana baganiriye na Bwiza.com, bavuga ko nyuma yo kugira ibyago bagapfusha ba nyina, ba se bagiye bishakira abandi bagore bakabata kandi nta bundi buryo bwo kubaho bafite.

Uwimana Sharifa w’imyaka 9 y’amavuko wiga mu mwaka wa 2 w’amashuri abanza, yavuze ko abana na mushikiwe w’imyaka 16 wiga mu wa 6 na we w’abanza, bakaba batuye mu mudugudu wa Kabuga, akagari ka Ryankana mu murenge wa Bugarama.

Avuga ko se  witwa Nkomeje yabatanye na nyina ari abana 2 yigira i Burundi, nyina aza gupfa se aza kumushyingura ikiriyo kirangiye yisubirira i Burundi agaruka agarukanye umugore babana muri uyu mudugudu, abana bavuga ko bagiye kuzicwa n’inzara kandi bahura na se buri munsi utabitayeho.

Agira ati “Dufite ibibazo by’urudaca, inzara igiye kuzatwicira mu nzu kubera ko turya ari uko mushiki wanjye yagiye gukorera abaturanyi bakamuha ibyo turarira, data yaratwihakanye kandi turaturanye, kubona ibikoresho by’ishuri n’imyenda ni ukubihabwa n’abagiraneza baba badupfuye agasoni.

Iyo tubuze icyo turya turaburara tukazindukira ku ishuri ntacyo twashyize ku kanwa turi bunatahe ntiturye. Nibaza uko tuzafata papa nidukura cyangwa abandi bana yabyaye kuri uwo mugore ubona dupfa ntatugirire impuhwe, tukifuza ko hagira igikorwa tugatabarwa”.

Bavuga ko n’inzu nyina yabasizemo uwo mugabo (se) yashatse kubirukanamo ngo ashyiremo uwo mugore wundi, ubuyobozi bukamutambamira, bakaba biga nabi ku buryo bumva barivamo bakihangana bitewe n’uburyo barikunda.

Umukuru w’umudugudu wa Nyehonga na wo wo muri aka kagari, Shumbusho Laurent, avuga ko imibereho  y’aba bana  iteye agahinda cyane kandi atari bonyine kuko mu kibaya cya Bugarama abana nk’aba bahari benshi kubera ubuharike n’ubushoreke bukihashinze imizi.

Umuyobozi w’aka karere, Harelimana Frédéric avuga ko iyi mibereho idakwiye ari yo mpamvu ababyeyi yita gito nk’aba badakwiye kujenjekerwa.

Ati “imibereho nk’iyo ntikwiye. Twumva umuryango ari wo ugomba kuba ishingiro kandi kugira ngo ube ishingiro ni uko ababyeyi babyumva, abafatanyabikorwa banyuranye, nk’amadini, n’abandi, inzego z’ubuyobozi na zo zikabyumva, tugafatanya kugira ngo umwana agire ubuzima buzira kwigunga.’’

Ubwo yari mu karere ka Rusizi muri Kamena uyu mwaka ku munsi w’umwana w’umunyafurika, Minisitiri w’uburinganire n’iterambere ry’umuryango, Nyirasafari Espérance na we yakigarutseho akibajijwe n’itangazamakuru, avuga ko uburere bw’umwana butagombera ngo ni uko ari kumwe n’ababyeyi bombi, ko igihe agize ibyago agatakaza umwe akomeza kurerwa neza, ashimangira ko ababyeyi yise gito nk’abo hari amategeko abahana kandi akwiye kubahirizwa.

Yagize ati “Ndasaba  ko bene iyo migirire twayica, umuntu akumva ko ari umubyeyi, ababyeyi gito bakamaganwa, haba mu mugoroba w’ababyeyi, ishuti z’umuryango n’abayobozi b’inzego z’ibanze bakadufasha kumenya urugo nk’urwo, uwo muntu agakurikiranwa akagirwa inama, atabyumva agahanwa kuko umubyeyi utererana umwana, utita ku nshingano za kibyeyi amategeko aramuhana.’’

Uyu mwana w’umuhungu wambaye ibidasa n’iby’abandi, abana na mushiki we wiga mu wa Gatandatu, nyina yarapfuye, se arabata

Ababyeyi basaba ko abo bita ababyeyi gito bakurikiranwa

Kanda hano ujye ubona amakuru yihuse kandi kugihe kuri Facebook no kuri twitter

Bahuwiyongera Sylvestre/Bwiza.com

 

 

from bwiza http://ift.tt/2xTBXZX
via IFTTT