Uganda: Abarwanyi 10 bahoze muri M23 bemeye gutaha mu gihe 11 bamaze gupfira mu nkambi

 

Igisirikare cya Uganda, UPDF, cyashyikirije Guverinoma ya Repubulika iharanira Demokarasi ya Congo Abarwanyi 10 bahoze mu mutwe wa M23. Ni mu gihe bivugwa ko abandi 11 bamaze gupfira mu Nkambi ya Bihanga bacumbikiwemo.

Uku gusubiza aba barwanyi byabaye kuri uyu wa kane nyuma ya saa sita ku cyicaro cya division ya 2 y’ingabo za Uganda ahitwa Makenke muri Mbarara. Umuhango ukaba wari uyobowe na komanda wungirije w’iyi division, Col Fred M. Karara wari uhagarariye umuyobozi we, Brig. Paul Lokech uri mu ruzinduko rw’akazi mu Burusiya.

Col Karara yatangaje ko bane mu bahoze mu mutwe wa M23 bacyuwe, bahungiye muri Uganda nyuma yo gutsindwa k’uyu mutwe muri Repbulika iharanira Demokarasi ya Congo, mu gihe abandi batandatu ngo bari batorotse inkambi ya Bihanga muri Ibanda, aho igisirikare cya Uganda cyari cyabahaye ubuhungiro.

Aba batandatu ngo baratorotse bashaka gusubira muri M23, ariko bongera gukubitwa inshuro bongera guhunga basubira muri Uganda nk’uko Chimpreports dukesha iyi nkuru ikomeza ivuga.

Aba ngo bongeye gufatwa bagerageza kwinjirira i Bunagana mu Karere ka Kisoro, bashinjijwe ibyaha barakatirwa igihano bagikorera muri gereza ya Ndorwa iri mu Karere ka Kabale.

Col. Kakara yagize ati: “Ntidushobora kubakira kuko bakoresheje nabi icumbi twabahaye tubakira muri Bihanga; batawe muri yombi, bamburwa intwaro bashyikirizwa polisi baburanishwa mu rukiko, abenshi muri bo baracyakora igihano”.

Ngo nyuma y’amezi 6 y’igifungo, basubiye muri bagenzi babo mu nkambi ya Bihanga, ariko nyuma basaba gusubira mu gihugu cyabo ku bushake. Icumi bashyikirijwe ku mugaragaro Ambasaderi wa Congo muri Uganda, Jean Pierre Masala, bikaba biteganyijwe ko kuri uyu wa gatanu burira bus ibacyura muri Congo.

Abo bagiye gucyurwa ni; Wo1. Faustin Ndajimana, Cpl. John Paul Nzeyimana, L/Cpl Derrick Munyankusi, Pte. Vincent Rukundo, Pte. Rodgers Kubwimana, Pte. Jimmy Nkurinziza, Capt. Frank Jevish Baguma, Capt. JohnBosco Mugisha, Lt. Eugene Abimaana Kiwasha n’umuyobozi wabo, Lt. Col. Alfonse Mashango Ngabo.

Ambasaderi wa Congo muri Uganda yaboneyeho gushimira perezida Museveni ku bushake bw’igihugu cye mu kurangiza ibibazo bya Congo, ndetse yizeza aba bahoze ari abrwanyi ko igihugu kuri ubu gifite amahoro kandi kiteguye kubakira bakagira uruhare mu iterambere ryacyo.

Ambasaderi yanahishuye umugambi wo kwinjiza mu gisirikare cya leta abahoze ari abarwanyi mu gihe babyifuza, aho yavuze ko muri bagenzi babo 189 batashye mu Ukuboza 2014, 129 kuri ubu bari mu gisirikare cya leta kandi bari mu kazi muri Beni.

Umwe mu bayobozi mu nkambi ya Bihanga, Maj. Peter Mugisa, ku rundi ruhande aremeza ko benshi mu bahoze muri M23 bari muri iyi nkambi batifuza gutaha, ndetse ngo abagera kuri 11 bakaba bamaze kuhapfira bazize impfu zisanzwe.

 

Kanda hano ubone amakuru yihuse kandi ku gihe kuri Facebook no kuri twitter

 

Dennis Ns./Bwiza.com

from bwiza http://ift.tt/2xgKSar
via IFTTT