Ubuyobozi bw'Ishyirahamwe ryo gutwara amagare bwashimiye Perezida wa Repubulika y'u Rwanda Paul Kagame kuba akomeje kubagaragariza ko abakunda kandi ababa hafi nyuma yo gutemberana na bo na we ari ku igare.
Kuri uyu wa kane tariki 07 Nzeri 2017, nibwo Perezida Kagame yagaragaye i Rubavu atembera ku igare.
Ni ibintu byatunguye abantu benshi kubona Perezida anyonga igare aho yanyuraga ku baturage bamwe bakamumenya bakanamusuhuza ndetse na we agahagarara akabasuhuza akabishimira mu rugwiro asanzwe agirira abaturage.
Amafoto ya Perezida Kagame atwaye igare yakomeje gucicikana ku mbuga nkoranyambaga cyane cyane urwa twitter aho uyu mukuru w'igihugu yari ari kumwe na Peter Greenberg, Umunyamakuru w'igihangange uzwi cyane kubera gukora inkuru zishamikiye ku gucukumbura imibereho y'abantu bakomeye binyuze mu bukerarugendo.
Ubuyobozi bwa FERWACY bubinyujije kuri Twitter bwashimiye Perezida Kagame urukundo adahwema kugaragariza umukino w'amagare.
Ubutumwa bwabo buragira buti: "Tuzi ko Perezida Kagame akunda siporo yacu kandi twishimiye kumubona yishimiye kunyonga igare. Turagushimiye nyakubahwa Perezida."
Abakinyi bo muri team Rwanda bakina mu ikipe nkuru y'abatwara amagare mu Rwanda na bo bashimishijwe no kubona umukuru w'igihugu atwara igare ari kumwe na bo i Rubavu.
Ku rukuta rwabo rwa twitter aba banyonzi bashimiye Perezida Kagame bamubwira ko banamushimira uburyo adahwema gufasha abanyonzi babigize umwuga.
Ubwo butumwa buragira buti: "Turabashimira Perezida Kagame na Peter Greenberg kuba mwaraje kwifatanya na Team Rwanda Cycling kunyonga igare, twizeye ko haza kugaragara n'andi amafoto menshi, twishimiye inkunga ihoraho ya Perezida Kagame"
Abakinnyi ba Team Rwanda banyuranamo na Perezida Kagame bose bari ku magare
Ni kenshi Perezida Kagame yagaragaje ko ashyigikiye abatwara amagare mu Rwanda kimwe nk'uko akunze kwerekana ko ashyigikiye abafite impano bose.
Ubwo Valens Ndayisenga, umukinnyi w'ikipe y'igihugu y'amagare, Rwanda Karisimbi, yari amaze kwegukana irushanwa mpuzamahanga ryo kuzenguruka u Rwanda ku magare, muri 2014, Perezida Kagame yaramushimiye cyane.
Ku itariki 17 Werurwe 2017 Ishyirahamwe ry'Umukino w'Amagare mu Rwanda, Ferwacy ryashyikirijwe imodoka yo mu bwoko bwa Toyota Land Cruiser ryari ryemerewe na Perezida Kagame mu 2014, ubwo yakiraga abakinnyi bari bamaze kwegukana Tour du Rwanda ku nshuro ya mbere.
Abaturage bishimiye Perezida Kagame bamubonye ku igare.
from Makuruki.rw | Amakuru Asesenguye! http://ift.tt/2gO20ts
via IFTTT
No comments:
Post a Comment