Rubavu: Abarokotse jenoside batishoboye bubakiwe inzu zatwaye akayabo ariko zitagira ubwiherero n’ibikoni

Inzu 58 zubakiwe imiryango y’abarokotse Jenosi yakorewe Abatutsi mu Rwanda batishoboye batuye mu murenge wa Kanzenze, mu karere ka Rubavu, ntizigira ubwiherero n’ibikoni byo gutekeramo, ku buryo abazihawe batekera hanze bakajya no gutira imisarani ku baturanyi babo.

Ni inzu 58, zuzuye zitwaye akayabo ka miliyoni 290 z’amafaranga y’u Rwanda, inzu imwe yagiye yuzura itwaye miliyoni 5. Abazubakiwe barishimira kuba bari mu nzu nziza ariko bakabangamirwa no kujya gutira ubwiherero mu baturanyi.

Izi nzu zubatswe n’akarere ka Rubavu ku bufatanye na RSSB, abazubakiwe abenshi muri bo ni abasaza n’abakecuru basizwe iheruheru na Jenoside yakorewe Abatutsi mu mwaka wa 1994, batagifite n’imbaraga zo kwiyubakira ibyo bikoni n’imisarani kandi ari ibintu nkenerwa mu buzima bwa buri munsi.

Murekatete Immaculee , ni umwe muri abo baturage, agira ati “twashimiye leta yongeye kutwubakira nyuma yaho amazu yari atangiye kutugwaho, ariko kandi nta bikoni tugira, dutekera hanze, kandi tukajya kwiherera ku baturanyi, twibaza impamvu batatwubakiye ubwiherero n’igikona kandi bazi neza ko nta mikoro yandi dufite”.

Ubuyobozi bw’akarere ka Rubavu, buvuga ko iki kibazo bukizi ariko ko byatewe n’uko mu masezerano akarere kagiranye na RSSB nk’umufatanyabikorwa wa ko bitarimo, ariko ko vuba bizaba byakemutse.

Umunyamabanga nshingwabikorwa w’Umurenge wa Kanzenze,  Nyiransengiyumva Monique ati “iki kibazo turakizi, ariko twakoze ubuvugizi muri RSSB nk’umufatanyabikorwa, batwemerera ko bitarenze uyu mwaka bazaba bakemuye iki kibazo”.

Kanda hano ujye ubona amakuru yihuse kandi kugihe kuri Facebook no kuri twitter

Magarambe Theodore/Bwiza.com

 

from bwiza http://ift.tt/2xNKtfe
via IFTTT