Nyaruguru: Hubatswe ikigo cyo gukemuriramo amakimbirane yo mu miryango

Mu murenge wa Nyagisozi, mu karere ka Nyaruguru hubatswe ikigo kizajya kiganwa n’abahuye n’ihohoterwa rishingiye ku makimbirane yo mu miryango kugira ngo bagirwe inama, uwahohotewe kandi ashobora kujya gucumbika muri iyi nyubako aho kurara ku gasozi.

Iki kigo cyubatswe kugira ngo ab’i Nyaruguru bagire imiryango itarangwamo amakimbirane

Ku kicaro k’iki kigo kizajya gitanga inama ku bashakanye bafitanye ibibazo, hari abakozi bazajya bakira uwahuye n’ihohoterwa ryo mu miryango bakamugira inama byaba ngombwa bakitabaza inzego z’ubutabera.

Muri iyi nzu hagaragaramo uburiri ku buryo uwahohotewe ashobora kuharara aho kugira ngo age gusembera mu gasozi cyangwa ngo age kurushya ababyeyi be abakinguza mu gicuku.

Bizumutima Obed wiyemerera ko yahoraga ahohotera umugore we avuga ko nyuma yo kugana iki kigo bakabagira inama yahise yumva ko nta mpamvu yo kubanira nabi umugore we, ubu bakaba babanye neza.

Ati ”Nahoraga mpohotera umugore bitewe nuko ambajije ku mutungo nabaga nasesaguye, yagira icyo avuga nkahita mukubita, aza kundega ku murenge batwohereza muri iki kigo batugira inama ubu narahindutse burundu ntanga ubuhamya kuko amakimbirane ntakirangwa iwacu.”

Nyiraneza Christine washakanye na Bizumutima avuga ko mu rugo rwabo hatakiranwa intonganya no guhohoterwa bya buri munsi.

Umuyobozi w’akarere ka Nyaruguru, Habitegeko Franciois avuga ko iyi nzu uruhare mu kubanisha neza imiryango yahoragamo amakimbirane.

Uyu muyobozi avuga ko muri aka gace hakunze kugaragara ihohoterwa rishingiye ku gitsina ariko ko bizeye ko iyi nzu izagira uruhare mu guhosha ibi bibazo.

Ati “Akenshi ihohoterwa riba nijoro, niyo mpamvu wasangaga bamwe barara ku gasozi babuze aho bahungira, iyi nzu rero ni yo ibafasha.”

Umukozi ushinzwe kwakira abagana iyi nzu, Uwikunda Odette avuga ko mu kwezi kumwe yakira abantu bari hagati ya 20 na 30 bafite ibibazo bifitanye isano n’ihohoterwa.

Uyu mukozi uvuga ko hari n’abagabo bahohoterwa ajya yakira, avuga ko ibibazo bakunze kwakira byiganjemo ibyo gusesagura umutungo, gucana inyuma n’ubuharike.

Iyi nzu kandi yakira n’abafite ibibazo byo guterwa inda zitateguwe bakagirwa inama.

Uzajya ahura n’ihohoterwa azajya aza kurara muri iyi nzu aho kujya mu gasozi

Bizumutima wahoraga ahohotera uwo bashakanye ngo ubu amahora arahinda mu rugo rwabo

Christine NDACYAYISENGA
UMUSEKE.RW/Nyaruguru

from UMUSEKE http://ift.tt/2wMUrN4