Gisagara: Umwaka wa 2018 uzasiga nta munyagikonko ukirema isoko rya ‘Ndaburaye’

Umurenge wa Gikonko, ni umwe mu mirenge 13 igize akarere ka Gisagara, ugizwe n’icyahoze ari Komini Mugusa y’iyahoze yitwa Perefegitura ya Butare. Hazwi cyane ku buhinzi bw’umuceri, abawuzi bemeza ko waba unurira.

Abatuye uyu murenge wa Gikonko bavuga ko batagira aho bahahahira cyangwa bagurisha umusaruro wabo, usibye umuceri. Udusoko tuhaba ni uturema nimugoroba bita Ndaburaye, ariko akarere ubu karabizeza ko isoko rizubakwa mu kagari ka Kiri rizuzura bitarenze 2018.

Mu kiganiro “Bite aho iwanyu” cya Radio Huguka, abatuye uyu murenge bavuga ko bavunwa no kugeza umusaruro wabo ku isoko, kuko ngo bitabaza aya Butare, Musha na Ntyazo, yose ari ku biromrtero birenga 30.

Mu guhaha ibyo bakeneye nabwo ngo barema udusoko twa nimugoroba bita “Ndaburaye”, tutajya tubonekamo imboga n’imbuto, kandi bihera.

Kuramba Theophile ushinzwe abikorera muri uyu murenge avuga ko “Nta muntu wazana igitebo cya Avoka mu gasoko ka Nimugoroba kuko kitashira, bahitamo kuzijyana mu masoko manini aho bishobora gushira”.

Undi muturage nawe avuga ko batabona aho bagurisha amatungo yabo, nabyo bibasaba kujya mu  Rwanza, hafi ya Butare.

Isoko bategereje imyaka itatu rigiye kubakwa

Kuramba Theophile, avuga ko hashize imyaka irenga itatu bemerewe isoko ryo mu Kiri ariko amaso ahera mu kirere. Ati “Aho rizubakwa baraherekanye, badushishikariza kuhubaka amazu y’ubucuruzi none yabuze abayakoreramo”.

Intandaro y’iki kizere cyaraje amasinde, ngo ni uko akarere ka Gisagara kari karemeye kwishyura abaturage bahafite amasambu bakahava isoko rikajya riharemera ritarubwakwa, ariko ngo nabyo ntikabikoze, bituma abaturage bakomeza kwihingira.

Umuyobozi wungirije w’akarere ka Gisagara ushinzwe iterambere ry’ubukungu, Hanganimana Jean  Paul avuga ko bashonje bahishiwe, ngo kuko uku kwezi kwa Nzeri gusiga abaturage bamaze kubarirwa, mu ivugurura ry’ingengo y’imari bakishyurwa, noneho isoko rikazubakwa mu ngengo y’imari y’umwaka utaha.

Agira ati, “Aba baturage nta soko bagira koko, na gato ko mu Kiri karemere hafi y’amazi. Twabemereye kububakira isoko ahantu hegutse, aho ni mudugudu wa Sanzu mu kagari ka Kiri, aho abatuye Gikonko bose bahurira ku buryo buboroheye ».

 Iri soko ryo mu Kiri kandi ngo rizafasha n’indi mirenge nka Rusatira ya Huye na Ntyazo ya Nyanza.

Kanda hano ubone amakuru yihuse kandi ku gihe kuri Facebook no kuri twitter

Karegeya Jean Baptiste/Bwiza.com

from bwiza http://ift.tt/2gS3fff
via IFTTT