Sugira Ernest ubagwa uyu munsi azamara amezi atanu adakina

Nyuma y’iminsi ibiri avunikiye mu myitozo y’ikipe y’igihugu Amavubi, Sugira Ernest agiye kubagwa mu bitaro bya ‘King Faisal hospital Kigali’. Arabagwa kuri uyu wa kane saa 13h. Azamara amezi atanu adakina umupira w’amaguru.

Sugira agiye kubagirwa mu bitaro bya Faisal

Rutahizamu w’imyaka 26 Sugira Ernest uherutse gusinnya amasezerano y’imyaka ibiri muri APR FC yari yongewe mu ikipe y’igihugu Amavubi asimbuye Mubumbyi Bernabe wabanjemo mu mukino ubanza utemerewe gukina kubera amakarita abiri y’umuhondo.

Ntiyahiriwe n’imyitozo ya Antoine Hey kuri uyu wa kabiri tariki 15 Kanama 2017 kuri stade regional ya Kigali kuko yagize ikibazo cy’imvune ikomeye. Ubwo bakinaga hagati yabo, Sugira Ernest yasimbukiye umupira mu kirere awuhaganiye na myugariro wa AS Kigali Kayumba Soteri, bamanutse uyu myugariro amukubita ivi mu mpfundiko bituma akandagira nabi avunika igufa ryo ku murundi (Tibia).

Yajyanywe mu bitaro bya ‘King Faisal hospital Kigali’ aho yitaweho n’abaganga bafatanyije n’abayobozi b’umupira w’amaguru mu Rwanda. Byemejwe ko agomba kubagwa (Tibia fracture surgery) kuri uyu wa kane tariki 17 Kanama 2017 saa 13h.

Gusa inkuru nziza ni uko abaganga bemeje ko nyuma yo kubagwa azamara amezi atanu hanze y’ikibuga, nubwo benshi bakekaga ko azamara umwaka wose hanze. Biteganyijwe ko azongera gutangira imyitozo muri Gashyantare 2018.

Nyuma yo kuvunika k’uyu musore wakiniraga AS Vita Club mu mwaka ushize w’imikino, Biramahire Christopher Abeddy wa Police FC na Nshuti Innocent wa APR FC nibo bahanzwe amaso mu mukino wo kwishyura wa Uganda uzabera kuri stade regional ya Kigali kuwa gatandatu tariki 19 Kanama 2017, kuko nibo ba rutahizamu Amavubi asigaranye.

Ifoto y’ikibazo yagize ku igufa

Roben NGABO

UMUSEKE

from UMUSEKE http://ift.tt/2uKVkGo