Kuki abanyarwanda bareba imipira, bagatera urwenya ariko ntibasome?- Peacemaker

Umuryango uharanira uburenganzira bw’Umwana, Save The Children uri mu bukaburambaga bwiswe ‘Mureke Dusome’ bwo guhamagarira Abanyarwanda kwitabira gusoma. Umuyobozi w’Inama Nkuru y’Itangazamakuru, Peacemaker Mbungiramihigo avuga ko hari hakwiye gukorwa ubushakashatsi bwimbitse ku kibuza Abanyarwanda gusoma kuko hari ibikorwa bitabira byagakwiye gusimbuzwa gusoma nko gutera urwenya no kureba imipira.

Peacemaker avuga ko Abanyarwanda batari bakwiye kureba imipira ngo bime agaciro gusoma

Ni mu biganiro byateguwe na Save The Children byareberaga hamwe uruhare rw’Itangazamakuru mu kwimakaza umuco wo gusoma.

Peacemaker Mbungiramihigo avuga ko Abanyarwanda batitabira gusoma nyamara bakagira ibindi bahugiramo bishobora kuba birushwa agaciro no gusoma.

Ati “Kuko dufite insomero hirya no hino ariko ubona abanyarzanda bajya gusomeramo ari bake cyane ku buryo abantu bahitamo guhura bakaganira, bagatera urwenya nyuma y’akazi  abandi bakajya mu mipira ariko ugasanga umwanya wo gusoma, wo kuba yakwihugura cyangwa gukora ubushakashatsi ntibawuha agaciro gakwiye.”

Uyu muyobozi w’Inama nkuru y’Itangazamakuru avuga ko uru rwego rurubumbatiye byinshi byafasha Abanyarwanda kuva ku rwego rumwe bajya ku rundi bityo ko rikwiye no kubakangurira gusoma.

Ati “Abanyarwana kugira ngo bagire uruhare mu iterambere ryabo ni uko bahora bihugura badashingiye ku biganiro bitandukanye bahabwa n’abayobozi gusa cyangwa ibyo bahabwa mu mashuri ahubwo bagomba guhora bihugura mu bitanganzwa mu nyandiko no mu mvugo.”

Peacemaker uvuga ko Abanyarwanda batigeze bagira umuco wo gusoma, avuga ko baha agaciro cyane ibitangazwa mu Itangazamakuru ariko ko biba bidahagije.

Ati “Ahubwo ugasanga barakurikirana ibica ku maradiyo na televiziyo ariko ugasanga abantu ntibabona umwanya wo kujya mu masomero ndetse n’abize ugasanga nabo ubwabo ntibafata umwanya wo gusoma ngo biyibutse ibyo bize kuko kugira ngo utere imbere wowe ubwawe  kugira ngo uteze imbere igihugu cyawe nuko ujyana n’ibihe…

Igihugu gitera imbere nk’u Rwanda kigomba kugira abantu bajijutse bafite ubumenyi buhagije, ibyo ntituzabivana mu bumenyi twahawe mu mashuri gusa ahubwo tuzabuvana mu bitabo dusoma no mu bushakashatsi bashyizwe ahagaragagra.”

Ubushakashatsi  bwakozwe n’umuryango Save the Children mu karere ka Gicumbi, bwagaragaje ko umwana ashobora kurangiza umwaka wa mbere atazi gutandukanya.

Save the Children ivuga kandi ko umwana ashobora kurangiza amashuri abanza atazi gusoma, ukavuga ko ibi biterwa n’bufatanye buke hagati y’ababyeyi n’abarimu.

Inzobere mu mbonezamikurure y’abana Coline Dusabe avuga ko umwana ashobora gutangira gusoma afite amezi atandatu, agasaba ababyeyi gutangira gukundisha abana babo gusoma bakiri bato kuko bakura babikunze.

Avuga ko hari ibyo bakwifashisha. Ati “Ubundi umubyeyi yakagombye kuririmbirira umwana, akamucira  imigani ndetse akamusomera inkuru zitandukanye z’abana, akamuganiriza kuko bimufasha kumenya zimwe mu nyunguramagambo  ku buryo umwana ajya gutangira kwiga iby’ibanze yarabihawe n’umubyeyi.”

Gahunga ya Mureke dusome yatangiye muri 2016, ikazageza muri 2020, igamije gukangurira gusoma abana biga kuva mu mwaka wa mbere kugeza mu wa Gatanu w’amashuri abanza.

Josiane UWANYIRIGIRA
UMUSEKE.RW

from UMUSEKE http://ift.tt/2wcH1uI