UPDATE: Comptable w’ibitaro bya Karongi yahagaritswe mu kazi

Nyuma y’amakimbirane yavugwaga hagati y’umuyobozi w’ibitaro bya Karongi na Comptable w’ibi bitaro kuri uyu wa kane ubuyobozi bw’Akarere ka Karongi bwahagaritse by’agateganyo Mme Uzamukunda Esperance wari Comptable.

Ku bitaro bya Karongi

Inkuru kuri aya makimbirane twayitangaje mu gitondo cy’ejo kuwa gatatu hashize iminsi Umuseke ushaka amakuru ku mikoranire n’ingaruka zayo ku bitaro bya Karongi.

Mu ibaruwa, Umuseke wabonye, ubuyobozi bw’Akarere buvuga ko bwashingiye kuri raporo y’umuyobozi w’ibitaro yerekana amabaruwa yandikiye uyu mukozi ku mikorere ye, hamwe n’inzandiko uyu mukozi yasubizaga umuyobozi we.

Ubuyobozi bw’Akarere kandi ngo bushingira ku ibaruwa bwandikiye Mme Uzamukunda kuwa 31/08 bumusaba ‘ibisobanuro ku mikorere ye mibi.’

Buvuga kandi ko bushingira ku zindi nyandiko bwamwandikiye n’ibisubizo yatanze ntibinyure ubuyobozi bw’Akarere.

Ubuyobozi bw’Akarere kandi ngo bwashingiye ku nama bwahawe n’akanama gashinzwe gukurikirana amakosa kateranya ejo kuwa 06 Nzeri 2017.

Ngo bushingira kandi ku ngingo ya 23 y’itegeko rigenga uburyo bwo gutanga ibihano ku bakozi ba Leta bakoze amakosa mu kazi, ingingo iteganya iby’ihagarikwa mu kazi by’agateganyo mu gihe hakorwa iperereza.

Umuyobozi w’Akarere ka Karongi niwe wasinye iyi baruwa ihagarika mu kazi by’agateganyo Mme Uzamukunda Esperance guhera ejo kuwa 08 Nzeri 2017, iki gihe cy’agateganyo ngo kikaba kitarenza amezi atandatu.

Iby’iyi baruwa byamenyeshejwe abayobozi barimo Minisitiri w’abakozi ba Leta, Minisitiri w’ubuzima, Komisiyo ishinzwe abakozi ba Leta, Guverineri w’Iburengerazuba n’abandi…

Sylvain NGOBOKA
UMUSEKE.RW/Karongi

from UMUSEKE http://ift.tt/2j6CTqf