*Yasabye bagenzi be bo muri EAC ubufasha mu gufata abo u Rwanda rwatangiye impapuro,
Mu nama ngarukamwaka ihuza Abashinjacyaha bakuru bo mu bihugu bigize EAC iteraniye I Kigali, Umushinjacyaha Mukuru w’u Rwanda, Mutangana Jean Bosco yasabye bagenzi be gusaba ubutabera bw’ibihugu byabo kohereza cyangwa kuburanisha abakekwaho Jenoside yakorewe Abatutsi mu Rwanda. Avuga ko gufata aba bantu bihishe mu karere bigoye ugereranyije n’abari mu bihugu byateye imbere kuko ho bafite uburyo bw’ikoranabuhanga bwo gukurikirana buri muturage.
Umushinjacyaha Mukuru avuga ko gufata abakekwaho Jenoside bari mu karere bitoroshye ariko igihe kizagera bagafatwa
Muri iyi nama y’ishyirahamwe ry’abashinjacyaha bo mu bihugu bigize EAC (East African Association Prosecutors/EAAP), Umushinjacyaha Mukuru w’u Rwanda, Jean Bosco Mutangana yavuze ko uku kwishyira hamwe nk’ubushinjacyaha bwa EAC buzatuma habaho gusangizanya ubunararibonye.
Avuga ko nk’Ubutabera bw’u Rwanda bufite byinshi bwakwigirwaho nko kuba nyuma ya Jenoside bwaragize mu kubanisha neza Abanyarwanda bubinyujije mu nkiko za Gacaca zashyizweho kugira ngo habeho ubumwe n’ubwiyunge.
Ati “Ni ikintu kitari cyarakoreshejwe mbere mu gukemura ibibazo mu bihe nk’ibi ariko ubu buryo bwageze ku ntego kandi izi nkiko zagize uruhare mu guhana abateguye Jenoside no kunga abaturage.”
Mutangana yasabye Abashinjacyaha bakuru bo mu bihugu bigize EAC (uretse u Burundi butitabiriye iyi nama) gukorana n’ubuyobozi bw’ibihugu byabo kugira ngo byohereze cyangwa bicire imanza abakekwaho kugira uruhare muri Jenoside babyihishemo.
Avuga ko abantu Ubushinjacyaha bw’u Rwanda bwatangiye impapuro zo kubafata ari benshi mu bihugu bigize umuryango wa Africa y’Uburasirazuba cyane cyane muri Uganda na Kenya.
Ibihugu byo ku mugabane w’u Burayi na America nka Canada, Ubuholandi, Denmark, USA bikomeje kohereza abakekwaho Jenoside barimo Dr Leon Mugesera na Mbarushimana bamaze gukatirwa gufungwa burundu na Charles Bandora wakatiwe igifungo cy’imyaka 30.
Mutanga avuga ko nubwo abihishe muri EAC Ari benshi ariko igihe kizagera bagafatwa, akavuga ko biba bitoroshye gubafata aba bantu bari mu bihugu bihana imbibi n’u Rwanda nk’uko byakoroha mu bihugu byateye imbere.
Ati “Ntabwo ari nk’ibihugu byateye imbere by’iburayi aho umuntu wese aba afite address ye [insurance number ye, social security number ye…] hano mu bihugu byacu umuntu ava mu gihugu kimwe akajya mu kindi nta n’ubwo bigusaba na passport, urimuka ukajya mu giturage bakakubura.”
Avuga ko nubwo bigoye ariko ubu busabye bagejeje ku bashinjacyaha bakuru bo mu bihugu bya EAC babwitezemo umusaruro mwiza mu gufata abakekwaho guhekura u Rwanda.
Ati “Hari address dufite, tukababwira tuti muzafufashe kuko amategeko mpuzamahanga yemera ko wohereza umuntu mu gihugu yakoreyemo icyaha akaburanishwa cyangwa wowe ukamuburanisha.
Erega nta n’ubwo ari ikibazo cyo kugira ngo babazane ahubwo barakora iki abo bashoboye kumenya aho bari. Icyo ni cyo tubasaba.”
Muri iyi nama ibaye ku nshuro ya gatandatu, Perezida wa EAAP akaba n’umushinjacyaha mukuru wa Kenya, Keriako Tabiko yagarutse ku matora y’abakuru b’ibihugu ari kuba muri bimwe mu bihugu bigize EAC.
Ati “U Rwanda rufite isomo rwatanga ku bindi bihugu byo mu karere birimo n’igihugu cyanjye (Kenya) uko byategura amatora akarangira mu mahoro.”
Uyu mushinjacyaha mukuru wa Kenya yizeje ko andi matora agiye kuba mu gihugu ke (aya mbere yateshejwe agaciro) azagenda neza, avuga ko kwishyira hamwe k’Ubushinjacyaha bwo muri EAC kuzagira uruhare mu kugenza ibyaha byugarije aka karere birimo iterabwoba no gucuruza abantu.
Umushinjacyaha mukuru wa Kenya, Tobiko avuga ko n’ubwo amatora y’iwabo yajemo kirogoya ariko ataha azagenda neza
Martin NIYONKURU
UMUSEKE.RW
from UMUSEKE http://ift.tt/2xEP8hk
No comments:
Post a Comment