Shampiyona y’u Rwanda ya ‘Athlétisme’ izitabirwa n’amakipe 8

Ishyirahamwe ry’imikino ngororamubiri mu Rwanda ‘FRA’ ryateguye shampiyona y’igihugu izitabirwa n’amakipe umunani yo mu gihugu kuri iki cyumweru tariki ya 10 Nzeri 2017. 

Shampiyona y’u Rwanda ya ‘Athlétisme’ izitabirwa n’amakipe 8

Abazitabira iyi mikino izabera kuri stade Amahoro i Remera bazahatana mu byiciro bitandukanye mu bagabo n’abagore kuva kuri metero 100, metero 200, metero 400, metero 800, metero 1500, m 3000, m 5000 n’ibihumbi 10.

Umwihariko wa shampiyona y’uyu mwaka ni uko hitezwe abakinnyi basaga 200 kuko amakipe umunani azayitabira yatewe inkunga na FRA mu myiteguro, anasabwa kuzana abakinnyi barenga 20. Ngo bizatuma hagaragara impano nshya muri ‘Athlétisme’ nkuko Umuseke wabitangarijwe na visi perezida muri iri shyirahamwe Kajuga Thomas.

“Twasabye buri kipe kuzana abakinnyi batari munsi ya 20 bivuze ko hari abazazana 30 n’abandi barenga. Ibi byose turi kubitegura kugira ngo umubare w’abazitabira iyi shampiyona uzabe munini maze tubonereho wenda n’abakinnyi tudasanzwe tuzi baturutse mu gihugu hose”.

Abakinnyi batatu muri buri cyiciro bakazagenerwa imidari ndetse n’ibahasha irimo amafaranga abategura shampiyona batashatse gutangaza kuko ashobora kwiyongera.

Roben NGABO

UMUSEKE

 

 

from UMUSEKE http://ift.tt/2xaSeM1