Minisitiri w’Ibikorwa Remezo, Musoni James yasoje inama yari imaze iminsi ine ibera i Kigali ihuje ba Engineers bo mu Rwanda n’abo muri Africa, abasaba kumenya inshingano bafite mu muryango mugari w’abantu, ko ibyo bakora biramutse bikozwe nabi byagira ingaruka zikomeye.
Ba Engineers 440 bujuje ibisabwa barahiriye kuba abanyamwuga biyemeje kubaha inshingano zabo kandi neza
Iyi nama yiswe 4th UNESCO Engineering Week and 2nd Africa Engineering Conference yasojwe harahira ku nshuro ya mbere abayobozi b’akanama kayobora Urugaga rwa ba Engineers mu Rwanda, abari muri Komite z’ako kanama zishinzwe imirimo itandukanye, ba Engineers b’abanyamahanga baba mu Rwanda na ba Engineers bose bakorera mu Rwanda bujuje ibisabwa bagera kuri 440.
Mu ijambo ryo gusoza iyi nama yatangiye tariki 25-29 Nzeri, Minisitiri w’Ibikorwa Remezo Musoni James yavuze ko gusangira ubumenyi muri iyi nama yigaga cyane uko Imyanda yo mu ngo muri Africa yacungwa neza ikabyazwa umusaruro, birangiye igisigaye ari ugushyira mu bikorwa ibyo bahakuye.
Yabasabye kubaka icyizere bagakora neza ibyo bubaka kuko ngo iyo bisenyutse bigira ingaruka ku bantu benshi kandi zikomeye.
Ati “Murebe iyi nyubako turimo (Convention Center), idusenyukiyeho ikatugwaho ingaruka byateza, ibiraro bisenyutse, n’ibindi byinshi. Inshingano mufite irenze urwego yumvikanaho, mukore ibintu byujuje ubuziranenge (standards).”
Aganira n’abanyamakuru nyuma y’iyi nama, Minisitiri w’Ibikorwa Remezo Musoni James yavuze ko impuguke ziturutse hirya no hino muri Africa n’abavuye hanze ya Africa bazobereye mu bintu byo gutunganya imyanda basigiye ubumenyi ba Engineers bo mu Rwanda.
Musoni avuga ko ku ruhande rw’u Rwanda hakozwe ibintu binyuranye mu rwego rwo kugera ku intego y’iyi nama y’uko Isi igomba guturwaho n’abantu ariko baba ahatarangwa umwanda.
Yavuze ko habayeho gushyiraho politiki ihamye igamije guhangana n’ikibazo cy’umwanda, hajyaho ikigo kihariye cyo gushyira mu bikorwa iyo politiki n’inzego kugera ku rwego rw’Akarere zikurikirana izo gahunda.
Ati “Ku rwego rw’Umujyi wa Kigali hariho gahunda ihera ku rugo yo gukurikirana imyanda ikomeye uko igenda kugera aho ishyirwa no ku turere birakorwa. Intera tugiye kugeraho ni uko ya myanda aho ijugunywa tuyifata tukayibyaza ibindi bikorwa nk’amashanyarazi cyangwa ifumbire.
Ikindi navuga ni uko imyanda irimo amazi mu mwaka utaha hano mu mujyi wa Kigali tuzashyiraho aho izanyura ikajya hamwe igatunganywa kugira ngo nayo ireke kuba umwanda.”
Kurahira ku nshuro ya mbere kw aba Engineers byatangiye, ngo bizabafasha kubahisha umwuga bakora nk’uko bikubiye mu magambo barahiragamo kandi uzabirengaho ahanwe n’amategeko.
Ati “Amagambo akubiyemo mu ndahiro ni uko bagoba kubahiriza amahame ajyenga umwuga kandi uburengaho agahanwa n’amategeko, Ubundi amahame agenga umwuga niko baba inyangamugayo bagakora ku buryo kubahiriza ibipimo (standards) bijyanye n’uyu mwuga bityo bikaba bizafasha mu gukomeza guteza imbere umwuga na ba Engineers.”
HATANGIMANA Ange Eric
UMUSEKE.RW
from UMUSEKE http://ift.tt/2xNPftj
No comments:
Post a Comment