Imvura y’umuhindo igiye kugwa ngo iri hagati ya 350mm na 450

*Ngo ni imvura isanzwe
*Ibi bipimo ngo si ihame nk’ibya Bibiliya
*Buri minota 15 ngo babona amakuru

Iteganyagihe nomero 41, ry’umuhindo (Nzeri – Ukuboza 2017) rivuga ko hazagwa imvura yok u gipimo cya Milimetero 300 kugera kuri 450, ibi ngo ni igiteranyo cy’imvura kuva igihe yatangiriye kugeza igihe izarangirira kugwa. Iyi ngo izaba ari imvura idafite umwihariko.

 

Meteo Rwanda yatangaje uyu munsi ko hagendewe ku bipimo by’imvura n’ubushyuhe bya station 13, mu myaka 34 ishize imvura y’umuhindo izaba ihagije nk’isanzwe igwa mu bihe byiza.

Batangaje ko ubushyuhe bwo mu Nyanja ngari bumaze igihe buri ku gipimo gisanzwe, ntibwiyongereye cyangwa ngo bugabanuke.

Intara y’Iburasirazuba, Kirehe, Kigali, Amajyaruguru, Huye Gisagara na Kamonyi na Nyanza, hateganyijwe imvura isanzwe ishobora kugabanuka ikajya munsi ya mm350.

Intara y’Iburengerazuba, Amajyaruguru (Burea Musanze), Amajyepfo (Nyaruguru na Nyamagabe) hateganyijwe imvura ishobora kugwa nk’isanzwe cyangwa ikiyongera.

Imvura y’umuhindo, izatangira mu cyumweru cya kabiri cya Nzeri kugeza mu cya mbere cy’Ukwakira 2017.

Icyumweru cya gatatu cy’Ukuboza kugeza mu cyumweru cya mbere cya Mutarama izaba itangiye gucika.

Meteo Rwanda isaba inzego  za Leta, imiryango yikorera n’abaturarwanda, bakwiye gushingira kuri iri teganyagihe bagafata ingamba zo kongera umusaruro no kwirinda ibiza n’ibindi.

Umuyobozi wa Meteo Rwanda avuga ko iteganyagihe batangaza ritaba “rishyizweho ingufuri nk’ijambo rya Bibiliya” ngo hashobora kuboneka izindi mpinduka kuko nabo bahora bapima buri munsi.

Yemeza ko ubu bafite ubushobozi bujyanye n’igihe ndetse bafite ibipimo bibaha amakuru buri minota 15 kuko mubipimo byabo ubu hari ibikorwa n’ibyogajuru na za Radar zerekana impinduka z’ibihe.

Ange Eric HATANGIMANA
UMUSEKE.RW

from UMUSEKE http://ift.tt/2gJO6ZG