Minisiteri y’Imicungire y’Ibiza n’Impunzi (MIDIMAR) iratangaza ko imvura yaguye mu minsi itanu y’intangiro z’uku kwezi kwa Nzeri yangije ibikorwa birimo inzu 293 na hegitari 178 zihinzeho imyaka.
MIDIMAR ivuga ko iyi mvura yaguye mu bice bitandukanye by’igIhugu yari irimo amahindu n’imiyaga byatumye zimwe mu nzu zigwa izindi zikiyasa.
Mu bikorwa byangijwe n’iyi mvura harimo ibyumba by’amashuri bitatu, insengero enye, inyubako za Leta ebyiri n’imiyoboro y’amashanyarari ibiri.
Iyi Minisiteri ivuga ko ibyago byatewe n’imvura yaguye muri iyo minsi itanu byakomerekeje abantu batanu; bihitana amatungo abiri.
Umuvugizi w’iyi Minisiteri, Twishime Claude avuga ko abenshi mu bo yasenyeye batuye mu manegeka; abandi bakaba bari batuye mu nzu zishaje zidakomenye n’izitaziritse ibisenge.
Uyu muvugizi wa MIDIMAR agira inama abaturage, ati “Bazirike ibisenge by’inzu zabo kugira ngo umuyaga utabigurukana, kwirinda gutura mu manegeka.”
Avuga ko abantu bakwiye gucukura ibyobo bijyamo amazi ava ku nzu kugira ngo atagira uwo asenyera, gusibura imiyoboro y’amazi kugira ngo akomeze aho agenewe kujya.
Umuvugizi Mukuru wa Polisi, ACP Theos Badege yasabye buri wese gukurikiza amabwiriza y’inzego za Leta zishinzwe gukumira no kurwanya ibiza kugira ngo badakomeza kugerwaho n’ingaruka zabyo.
Ati “Ntawabuza imvura y’amahindu kugwa, ariko ko birashoboka gukumira ndetse no kwirinda ibyago bishobora guterwa na yo.”
Ikigo cy’igihugu cy’iteganyagihe gitangaza ko muri iki gihe cy’umuhindo hazagwa imvura iri hagati ya Mm 350 na 450, ikazaba ari imvura idakanganye, izeza imyaka.
RNP
Daddy SADIKI RUBANGURA
UMUSEKE.RW
from UMUSEKE http://ift.tt/2xgUSAG
No comments:
Post a Comment