Bitewe n'ubwinshi bw'imanza zijyanwa ku rwego rw'umuvunyi zisabirwa gusubirishwamo akenshi bitari na ngombwa, harimo kwigwa uburyo bwo kugabanya umubare w'izo manza mu rwego rwo korohereza akazi abakora mu rwego rw'umuvunyi ko kujonjora imanza zigomba gusubirwamo n'izitagomba gusubirwamo.
Akenshi iyo abantu baciriwe imanza n'inkiko, usanga bigorana ko uwatsinzwe yemera instinzwi. Iyo atemeye ko yatsinzwe rero yiyambaza inzira yo kujurira mu zindi nkiko zirengeje ubushobozi urwamuciriye urubanza.
Iyi nzira yo kujurira iragenda ikagera aho umuntu yiyambaza urwego rw'umuvunyi kuko rwo rufite n'ububasha bwo gusubirishamo imanza zaciwe n'urukiko rufite ububasha busumba izindi nkiko zose (urukiko rw'ikirengo)
Ubusanzwe, imanza umuvunyi asabira gusubirishamo ni iziba zigaragaramo ruswa n'akarengane, ariko bitewe na ya myitwarire yo kutemera gutsindwa usanga urwego rw'umuvunyi rwakira imanza nyinshi cyane kandi hakorwa isuzuma bagasanga inyinshi nta karengane cyangwa ruswa byagaragaye mu guca urwo rubanza.
Ubwo Sena Inteko Rusange idasanzwe yemerejwemo raporo ya Komisiyo ya Politiki n'Imiyoborere Myiza ku isuzumwa rya dosiye z'Abayobozi baherutse guhabwa imirimo barimo na Murekezi Anastase wemejwe nk'umuvunyi mukuru, abasenateri bagarutse ku ngingo yo kugabanya umubare w'imanza zijyanwa ku rwego rw'umuvunyi kandi nyamara akenshi ziba zitarimo akarengane na ruswa.
Abasenateri bavuze ko hari imishinga yo kuvugurura amategeko irimo gukorwa kuburyo abaperezida b'inkiko runaka bazahabwa ububasha bwo gusuzuma dosiye z'abasaba gusubirishamo imanza basanga koko harimo akarengane zikaba ari bwo zishyikirizwa umuvunyi.
Senateri Sindikubwabo Jean Nepomuscène, Perezida wa Komisiyo ya Politiki n'Imiyoborere myiza yasuzumye dosiye z'aba bayobozi bemejwe, yavuze ko imanza zishyikirizwa umuvunyi zigenda ziba nyinshi.
Ati: "Iki kibazo cy'ubwinshi bw'imanza zisabirwa gusubirishwamo byaje kugaragara ko zigenda ziba nyinshi kandi noneho hakorwa isuzuma, iyo bigeze ku rwego rw'umuvunyi barasesengura ndetse zimwe zikajya gusubirishwamo, ariko iyo urebye ijanisha ry'imanza ziba zirimwo akarenganeugasanga ni nkeya cyane kandi biha umurimo munini ba bakozi bake bo ku rwego rw'umuvunyi kugirango bazajonjore basohoremo bike cyane.
Senateri Sindikubwabo avuga ko nko mu gihe urubanza rwaciwe n'umucamanza mu rukiko runaka, umuburanyi ashobora gutakambira perezida w'urukiko agakora isuzuma ry'urwo rubanza kuko ataba ari we waciye urwo rubanza noneho akareba niba harimo akarengane mu mikirize y'urubanza.
Avuga kandi ko iryo suzuma rishobora gukorwa n'urukiko rurusha ububasha urwaciye urubanza na bo bagasesengura bakareba niba koko mu mikirize y'urubanza haba hari akarengane karimo.
Ibi ngo bizafasha kugabanya imanza zishyikirizwa umuvunyi kandi bitari ngombwa ko zijyanwayo. Ati: "Iyi gahunda iri mu nzira,... umuvunyi mukuru asanga mu bwuzuzanye no mu busumbane bw'inkiko ndetse n'ubusumbane bw'inzego mu rukiko rumwe, isuzuma rishobora gukorwa rigafasha kugirango hajye ku muvunyi imanza zasesenguwe kurusha uko byagendaga."
from Makuruki.rw | Amakuru Asesenguye! http://ift.tt/2vOzP89
via IFTTT
No comments:
Post a Comment