Gitifu w'Akarere ka Nyagatare yatawe muri yombi azira gukoresha nabi imitungo ya Leta

Umuvugizi wa Polisi mu Ntara y'Iburasirazuba IP jean Bosco Dusabe, yabwiye Ukwezi.com ko Alex Mugabo na mugenzi we Fred Kayitare babafashe ejo ahagana mu ma saa cyenda n'igice z'igicamunsi (15h30), ubu bakaba bafungiye kuri station ya Polisi ya Nyagatare.

IP Dusabe yagize ati "Nibyo koko Umunyamabanga nshingwabikorwa w'Akarere ka Nyagatare Alex Mugabo yatawe muri yombi n'inzego za Polisi aho akekwaho guha isoko ryo kubaka umuhanda wa Nyagatare - Kizinga umuntu utarikwiye."

IP Dusabe akomeza avuga ko isoko ryo kubaka uyu muhanda ryatanzwe muri ubu buryo rifite agaciro k'amafaranga y'u Rwanda 1 157 931 600.

Uretse uyu Munyamabanga nshingwabikorwa Alex Mugabo ushinjwa gutanga isoko mu buryo bunyuranyije n'amategeko, IP Dusabe avuga ko afunganye na Kayitare Fred ushinzwe amasoko muri aka karere ka Nyagatare.

Aba bagabo bombi bacumbikiwe kuri Sitasiyo ya Polisi mu mujyi wa Nyagatare mu guhe bakiri gukorwaho iperereza kugira ngo bamenye ikihishe inyuma y'uko gutanga isoko binyuranije n'amategeko.

from UKWEZI.COM http://ift.tt/2xdbyJs
via IFTTT