Denis Gacinya, PAC irasaba ko akurikiranwa kuri za miliyoni aregwa kuriganya n’i Rusizi

*Akarere ka Rusizi kamwishyuye 495 yari guhabwa miliyoni 253
*Ngo baramubuze…PAC bati “Ko yirirwa kuri match, tumubona mu bitangazamakuru, yaburiye he?”
*Hon Abbas ati “Mu ngamba zo kugaruza ibya Leta muhere kuri uyu Gacinya.”

Abadepite bagize Komisiyo ishinzwe gukurikirana imikoreshereze y’imari n’umutungo bya Leta basabye abayobozi b’akarere ka Rusizi n’Ubushinjacyaha gukurikirana Dennis Gacinya wagiye uhabwa amasoko ya Leta nk’uhagarariye kompanyi yitwa MICON akishyurwa amafaranga arenze ibikorwa yakoze nko kuba aka karere karamwishyuye 495 700 000 Frw nyamara igenagaciro ry’imirimo yari yakoze ryaragarageje ko ikwiye miliyoni 253.6 Frw.

Gacinya Denis yavuzwe no mu kibazo nk’iki mu karere ka Gatsibo

Abayobozi b’akarere ka Rusizi bari bitabye iyi Komisiyo yo mu nteko Ishinga Amategeko kugira ngo bisobanure ku makosa yagaragaye muri raporo y’Umugenzuri Mukuru w’Imari ya Leta arimo kwishyura amafaranga adahwanye n’ibikorwa aka karere kabaga karakorewe

Mu nyandiko z’amasezerano y’amasoko y’aka karere, harimo kuba muri 2013 karahaye isoko Kompanyi MICON ya Gacinya Dennis ryo kukagemurira amapoto y’amashanyarazi 572, nyuma bakaza kwemeranya ko agomba kubazanira amapoto 830.

Iyi kompanyi yaje kugemura amapoto 635 yishyurwa 495 700 000 Frw nyamara igenzura ryakozwe na REG ryaje kugaragaza ko imirimo yakozwe n’uyu rwiyemezamirimo ifite agaciro ka miliyoni 253,6 Frw.

Hon Nkusi Juvenal uyobora PAC yavuze ko iyi Komanyi ya Gacinya atari ubwa mbere igarutsweho muri ibi bikorwa kuko no ku wa mbere yari yaje kwisobanura ku bibazo afitanye n’akarere ka Gatsibo.

Mu masezerano y’akarere ka Gatsibo, avugwaho kwishyurwa amafaranga y’imirengera kuko hari aho ipoto imwe yayishyurwaga miliyoni 2.6 Frw, naho cash power imwe akayishyurwa miliyoni 3,8 Frw.

Depite Nkusi wabazaga abayobozi b’akarere ka Rusizi kitabye uyu munsi, yababwiye ko Gacinya yavuze ko yareze akarere ka Rusizi, ariko abayobozi bako barabinyomoza ahubwo ko ari bo bamureze.

Aba bayobozi bemera ko aya makosa yabayeho koko, bavuze ko uyu rwiyemezamirimo bamubuze kugira ngo afatwe aryozwe aya makosa.

Ubushinjacyaha bwabajijwe ikibura kugira ngo uyu mugabo afatwe, bwavuze ko binagoye kumukurikirana kuko igihe cyo kumukurikirana cyarangiye kuko itegeko rihana icyaha akekwaho riteganya igihano kiri hagati y’amezi 6 n’umwaka n’igice kandi hakaba hashize imyaka ine.

Ibisobanuro kitanyuze abadepite bagize PAC, bavuze ko uyu muyobozi w’ikipe ya Rayon Sport ntaho yaburiye ahubwo ko aba bayobozi bakomeje kumukingira ikibaba ku bushake.

Hon Niyonsenga Theodomir ati “Ariko mwamuburiye he ko yirirwa kuri match, twirirwa tumubona mu bitangazamakuru asinya amasezerano kuki mutajya kuri match ngo mumufate?”

 

from UMUSEKE http://ift.tt/2yGK9wO