Igihe: Masaka: DUHAMIC ADRI yahaye abaturage inka 20

Musabyimana Madeleine ashyikirizwa inka.

Kuri uyu wa kane, ku bufatanye n’ubuyobozi bw’inzego z’ibanze, umushinga DUHAMIC ADRI wahaye abaturage bo Murenge wa Masaka mu Karere ka Kicukiro inka 20 mu rwego rwo kubashyigikira kugira ngo babashe kwiteza imbere.

Bahawe inka nziza za kijyambere.

Musabyimana Madeleine ufite abana batanu n’umugabo atuye mu Murenge wa Masaka, Akagari ka Gitaraga, umudugudu wa Ruhango nyuma yo guhabwa inka yavuze ko igiye kumuhindurira ubuzima

Yagize ati “Mu buzima bwanjye nari mbayeho ndi umuntu uca inshuro ngakorera amafaranaga 1 000 (Frw) buri munsi, kugira ngo mbone uko abana barya, ntabwo nabashaga gukorera amafaranga ngo umwana abone amata anywa ariko biranshimishije kuko ngiye kujya mbona amata nkabaha ngo banywe.”

Musabyimana ni ’umuturage utishoboye dore ko anabarizwa mu kiciro cya kabiri cy’ubudehe, ngo we n’umugabo we nta kintu bakora uretse guhingira abantu bakabaha amafaranga y’u Rwanda 1 000 yo kurya.

Avuga ko inka bamuhaye izamuteza imbere, kuko ngo azayorora neza ayiha ubwatsi buhagije ku buryo izamuha umukamo akabona amata aha abana, akabona n’ayo agurisha kugira ngo atere imbere.

Musabyimana Madeleine ashyikirizwa inka.

Benineza Innocent, umunyamabanga nshingwabikorwa muri DUHAMIC ADRI yatanze izi nka yavuze ko iyi gahunda ikomoka mu bikorera bishyize hamwe bagenera gahunda ya Gir’Inka amafaranga kugira ngo bashyigikire Perezida muri gahunda yo kugeza inka ku Banyarwanda, aya mafaranga yaje kunyuzwa mu miryango ine igomba gushyikiriza abaturage izo nka.

Ati “Muri iyo miryango ine harimo DUHAMIC ADRI ku ikubitoro uzatanga inkunga y’inka 92 zizagurwa amafaranga y’u Rwanda agera kuri miliyoni 45.”

Yongeraho ati “Inka 42 tuzazitanga muri Kicukiro, maze 50 tuzitange mu Karere ka Muhanga. Muri Kicukiro mu murenge wa Masaka twatanze inka 25 (babaye batanze 20), muri Kanombe tuzatanga inka 10, maze muri Gatenga tuzanga inka 7 zose hamwe ni 42.”

Umuyobozi wungirije wa Karere ka Kicukiro ushinzwe imibereho myiza y’abaturage Baingana Emmanuel yabwiye abaturage ko inka bahawe bivuze ko bahawe ubukire, abasaba kugerageza bakazifata neza kuko ngo ari igihango bafitanye n’ubuyobozi bw’ighugu.

Mu magambo ye ati “Mwakagombye kuzifata neza kuko zigiye kubavana ahantu zibageze ahandi mu rwego rw’imibereho myiza, mu rwego rwo kubafasha kugira ngo mufashe imuryango yanyu. Izi nka mugomba kuzifata neza zikabageza ku iterambere ryifuzwa ndetse mukabasha no kuremera abandi.”

Umuyobozi wungirije ushinzwe imibereho myiza mu karere ka Kicukiro Baingana Emmanuel

Musabyimana na bagenzi be bahawe inka bashimiye Leta cyane kuri gahunda ya “Gir’inka” kuko ngo inka bahawe zigiye kubakura mu bukene.

Muri uyu muhango, imiryango 25 yagombaga kubona inka uyu munsi ntabwo yose yabashije kuzibona kuko basanze inka 5 zirwaye banga kuzizana, byatumye imiryango 20 gusa ariyo izihabwa.

Mutetiwabo Peledicanda, Veterineri mu Karere ka Kicukiro yavuze ko indi miryango 5 nayo izahabwa inka yagenewe mu gihe kitarenze ibyumweru bibiri.

Umuryango DUHAMIC ADRI uvuga ko mu nka bateganya kuzatanga haba Kicukiro na Muhanga zose ni 92 kandi zizatwara amafaranga y’u Rwanda agera kuri miliyoni 45.