Birakekwa ko amagambo Umuraperi Fireman yaririmbye mu ndirimbo ‘Bihibindi’, avugamo umuntu yise Kazungu witukuje yavugaga umuhanzi mugenzi we Jay Polly n’ubwo uyu muhanzi we adashaka kwerura ngo abyemeze.
Mu minsi ishize ni bwo Fireman wahoze mu itsinda rya Tuff Gangz, yashyize hanze indirimbo yise ‘’Bihibindi’’, mu magambo y’iyi ndirimbo hari izina yagarutseho rya “Kazungu’’, abakunzi b’umuziki nyarwanda bamwe batekereje ko yashakaga kuvuga Jay Polly.
Ku ruhande rwa Fireman yahakanye aya makuru, avuga ko ari urugero rusanzwe yashaka gutanga, yakomeje avuga ko Kazungu yashatse kuvuga muri iyi ndirimbo atari Jay Polly, asobanura ko ari urugero rw’izina yashakaga gutanga ko uko yavuze iryo zina ari nk’uko yavuga irindi zina.
Uyu muraperi ashimangira ko abavuga ko ari Jay Polly yavugaga atazi aho babikura, ko abantu bagakwiye kumva ukuri yabibwiriye.
Abakurikiranira hafi umubano w’aba bahanzi bombi bemeza ko wajemo agatotsi, ahanini bitewe n’ubwumvikane bucye bwabaye mu batangije itsinda Tuff Gangz, bikaba ari nabyo bituma mu magambo basigaye baririmba mu ndirimbo zabo hacyekwamo guterana amagambo kabone n’ubwo ba nyir’ubwite batabyerura ngo babyemera.
Tuff Gang ni itsinda ryatangiye kumvikana mu muziki nyarwanda mu mwaka wa 2008, ryari rigizwe n’abahanzi 5 aribo P Fla, Green P, Fire Man, Jay Polly ndetse na Bull Dog.
Ku ikubitiro mu mwaka wa 2010 P fla yaje kwirukanwa muri iri tsinda ku mpamvu zitasobanuwe neza, ahanini ariko bagenzi be bamushinjaga kugira imyitwarire itari myiza.
Aba bagabo bane bakomeje umuziki kugeza muri 2013 wabonaga nta kibazo kirimo hagati ya bo, basohoraga indirimbo bari kumwe ndetse rimwe na rimwe buri umwe muri bo agakora kugiti ke.
Jay Polly yaje gukora indirimbo nyinshi zamenyekanye cyane bituma arenga kuri bagenzi be, ibi byanatumye bagenzi be batangira kumwishyiramo ko akoresha izina ry’itsinda mu nyungu ze bwite, aha niho amakimbirane yatangiye kuvuka, bisa naho buri wese hano yari akomeje umuziki kugiti cye ariko babigira ibanga.
Mu mpera za 2015 ni bwo ibyo bakomeje guhisha byaje kujya hanze maze aba bagabo baratandukana ku buryo bweruye, Green p, Fire Man na Bull Dog bajya ukwabo bashinga irindi tsinda bise Stone Church, Jay Polly nawe agumana Tuff Gang nshya yongeramo abandi bahanzi batavuzweho rumwe, Aha niho hatangiye kumvikana indirimbo ziganjemo kurasana mu magambo ku mpande zombi, ni naho abakurikiranye aba bahanzi bahera bemeza ko Kazungu uvugwa muri bihibindi ari Jay Polly.
Kanda hano ujye ubona amakuru yihuse kandi kugihe kuri Facebook no kuri twitter
Jean de Dieu Dushimimana – bwiza.com
from bwiza http://ift.tt/2v5aEJm
via IFTTT
No comments:
Post a Comment