*Leta ngo irakora ibishoboka ngo abarimu bigisha amarenga baboneke,
*Hari ubwo kuvukana atavuga, atanumva biva ku ruhererekane rw’imiryango.
Abafite ubumuga bwo kutumva barifuza ko ururimi rw’amarenga rwakwigishwa mu mashuri nk’uko izindi ndimi nk’Ikinyarwanda, Icyongereza zigishwa ku bw’inyungu z’umwana ukivuka ufite ubumuga bwo kutumva no kutavuga.
Ntigulirwa Jeanne d’Arc ufite ubumuga bwo kutumva no kutavuga na we akoresha amarenga
Hari abashobora kuba bibaza ngo umuntu utumva ni nde, cyangwa ngo umuntu agira ubumuga bwo kutumva bigenze bite.
Mu kiganiro Umuseke wagiranye na Ntigulirwa Jeanne d’Arc umukozi muri Handicap Internation ufite ubumuga bwo kutumva no kutavuga, yadutangarije ko umuntu ashobora kuvuka atumva, ashobora kurwara bikamuviramo ubumuga bwo kutumva n’ibindi. Yongeraho ko uwo muntu na we afite uburenganzira bungana nk’ubw’abandi bumva neza.
Ntigulirwa Jeanne d’Arc avuga ko umuntu ashobora kuvuka utumva,biturutse ku ruhererekane rw’imiryango rw’amaraso yo mu muryango (heredity).
Ati “Niyo mpamvu ubona umuntu agerageza gusohora ijwi, kandi ijwi rye risohoka nk’umuntu wumva unavuga nubwo ritumvikana neza, kuko mu gihe yari afite imyaka yo hasi yarumvaga akanavuga nyuma aza kurwara bimuviramo ubumuga bwo kutumva no kutavuga, hari undi uvuka ntiyigere yumva, ntanavuge.”
Uyu mukozi wo muri Handicap International avuga ko abantu batavuga, batumva muri bo 90% akenshi bavuka ku babyeyi bumva, banavuga ariko ababyeyi bakaba batazi impamvu umwana wabo atavuga cyangwa atumva.
Ati “Umubyeyi arabyara, akabona umwana ari gutera umunywa “babababa”, “Papapapa” ariko umubyeyi atazi icyo gukora, ibyo biteza ikibazo kuri wa mwana utazi kuvuga no kumva, ugasanga bwa burezi bw’ibanze duhabwa n’ababyeyi kuri we bibaye ikibazo kuko ubumenyi bwacu muri rusange butangirira hasi.”
Avuga ko gutangira kwiga ururimi rw’amarenga bisaba gutangirira hasi kuko iyo udatangiriye hasi kujya kwiga biba ikibazo cyane, kuko ngo kuvuka ukageza imyaka icumi utagira ururimi ni ikibazo n’imbogamizi ikomeye cyane.
Ati “Ni by’ingenzi ko ururimi rw’amarenga rwigishwa kimwe nk’Ikinyarwanda, cyangwa Icyongereza, kugira ngo rutangirire kuri wa mwana ukivuka utumva, utavuga kugira ngo azakure afite ururimi, bizamufasha mu buzima bwe bwa buri munsi nk’Umunyarwanda.”
Rangira Aime Frederick ushinzwe gutegura no gushyira mu bikorwa umushinga “Media for deaf Rwanda” avuga ko gahunda yo kwigisha ururimi rw’amarenga ari ingenzi cyane mu bintu bijyanye n’uburezi bw’umwana ukiri muto.
Ati “Hari bamwe bakomoka mu muryango ukize nibura babajyana mu ishuri ry’amarenga, ugasanga mu myaka irindwi nibwo bwa mbere bamenye ururimi, ni ikintu gikwiye gushyirwa imbaraga (kwigisha amarenga) kuko uriya muntu ubwonko bwe ntibukura neza kuva akiri umwana.”
Dr. Joyce Musabe umuyobozi wungirije ushinzwe integanyanyigisho mu Kigo cy’Igihugu gishinzwe Uburezi, REB avuga ko hari uburezi budaheza haba ku bana b’abakobwa, abahungu no ku bana bafite ubumuga ngo bigana n’abandi, iyo ngo ni politiki ya Leta ihari kuva na mbere, ibindi ngo bigenda bikorwa uko amikoro abonetse.
Agira ati “Kugeza ubu hari abana biga mu mashuri kandi bafite ubumuga, ubumuga buratandukanye uko bugenda butandukana ni nako bigenda bishyirwa muri program, ariko gahunda ya Sign language (amarenga), ni gahunda ishaka abarimu babizobereye.”
Sign language ngo ni ikintu Leta ishyira mu bintu by’ibanze cyane, nk’uko Dr Musabe abivuga ngo bamwe bagiye kwiga kugira ngo bazaze bafashe abafite ubumuga.
Ati “Leta ibyitaho cyane kuko turabikeneye kugira ngo baze bajye mu mashuri bahugure abandi barimu, ni ikintu dushaka cyane rwose kandi uko amikoro agenda aboneka tubona abadufasha.”
Kugeza ubu ikigo cy’igihugu cy’ibarurishamibare gitangaza ko abafite ubumuga bwo kutumva no kutavuga mu Rwanda ari 33 574.
Rangira Aime Frederick ushinzwe gutegura no gushyira mu bikorwa umushinga ‘Media for deaf Rwanda’
Aba ni abasemuzi babigize umwuga mu gusobanura amarenga
Hano ni mu mahugurwa yateguwe na ‘Media for Deaf Rwanda’ ihugura abanyamakuru mu cyumweru gishize
Daddy SADIKI RUBANGURA
UMUSEKE.RW
from UMUSEKE http://ift.tt/2wRUuFb
No comments:
Post a Comment