Umubyeyi uzashaka kukuroga agushyiramo ingengabitekerezo ya Jenoside uzamusuzugure

Abanyeshuri bo mu ishuri ryisumbuye rya ESIM riherereye mu Murenge wa Kiramuruzi ho mukarere ka Gatsibo, basabwe kujya bamagana bakananyomoza ababyeyi babo mu gihe bashaka kubacengezamo ibitekerezo by’ingengabitekerezo ya Jenoside.

Babisabwe  n’umuyobozi w’iri shuri  Habiyambere Célestin kuwa 23 Kanama 2017. Hari mu kiganiro ku  kurwanya jenoside n’ingengabitekerezo yayo bagejejweho n’ umuhuzabikorwa wa Komisiyo y’Igihugu yo Kurwanya Jenoside (CNLG) mu Turere twa Gatsibo na Nyagatare, Niwemutoni Laetitia, nkuko bigaragara ku rubuga rwa CNLG.

Muri iki kiganiro cyitabiriwe n’abanyeshuri 176, Umuyobozi w’ikigo n’abarimu 10, Habiyambere yasabye uru rubyiruko kwamagana ababyeyi babashora mu ngengabitekerezo ya jenoside.

Habiyambere ati “Twese tubatoza kubaha mbere na mbere ababyeyi banyu,ariko umubyeyi uzashaka kukuroga agushyiramo ingengabitekerezo ya Jenoside uzamusuzugure”.

Umuhuzabikorwa wa CNLG muri Nyagatare na Gatsibo, Niwemutoni Laetitia,  yasobanuye amateka ya Jenoside yakorewe Abatutsi, uko yateguwe ndetse n’uko yashyizwe mu bikorwa.

Yakomeje asobanurira uru rubyiruko icyo ingengabitekerezo ya Jenoside ari cyo, ibiyiranga ndetse n’uko yigishijwe Abanyarwanda kugeza igejeje u Rwanda kuri Jenoside yakorewe Abatutsi mu 1994 igahitana abasaga miliyoni imwe.

Aba banyeshuri kandi basabwe guhaguruka nk’urubyiruko bakarwanya Jenoside n’ingengabitekerezo yayo, kugira ngo  babashe gutegura u Rwanda rw’ejo hazaza ruzira Jenoside n’ingengabitekerezo yayo cyangwa ivangura iryo ari ryo ryose.

Kanda hano ujye ubona amakuru yihuse kandi kugihe kuri Facebook no kuri twitter

Ntakirutimana Deus/bwiza.com

from bwiza http://ift.tt/2xBoNQm
via IFTTT