Rwamagana: Bahangayikishijwe n’abajura b’insoresore bambura abagenzi ku mugoroba

Abatuye mu mujyi wa Rwamagana mu nteko rusange y’abaturage b’abakagari ka Cyanya mu murenge wa Kigabiro yabereye ku biro by’umurenge wa Kigabiro ku wa kabiri tariki 29 Kanama 2017,  bagaragaje ko babangamiwe n’insoresore zibasira abagore n’abakobwa zikabambura.

Abaturage bavuze ko ku mugoroba abasore ndetse harimo n’abana b’abahungu bategera abagore n’abakobwa mu nzira bakabambura amatefone n’ibindi bafite bakiruka.

Umuturage utuye mu mudugudu wa Kamata yasabye inteko rusange y’abaturage gushakira ikibazo umuti kuko giteye inkeke.

Agira ati “hari abana b’abasore batega abagore bakabambura amatelefoni ejo bambuye umugore telefoni bariruka kandi babikora buri munsi, ubuyobozi budufashe kurwanya bariya basore kuko bahohotera abaturage”.

Ushinzwe umutekano mu mudugudu wa Kabeza, Kayumba na we yavuze ko iki kibazo gihari kandi ko bakizi ariko bagahura n’imbogamizi z’uko  bamwe mu babyeyi bakingira ikibaba abana babo b’abajura.

Ati “mwese murabizi ko abana bamwe tubafata, ariko ugasanga ababyeyi iyo tugiye gufata abana babo biba ari intambara barengera abana babo, uyu mujyi abantu bose bigize abanyamujyi, abana bariba, nk’ubu hari umwana twafashe yibye telefoni igura nk’ibihumbi 200 ariko yayigurishije ibihumbi 20 tugiye kumufata byabaye intambara”.

Arakomeza, ati “hari abandi bana binjiye mu gipangu hano haruguru bafata inkweto zose zari mu gipangu bazipakira umufuka, abo nabo twarabafashe, abiba amatefoni bahengera abavuye gucuruza  bakabagendaho  kugeza babonye uko babashikuza telefoni”.

Ubuyobozi bw’umurenge bwijeje abaturage ko bugiye gushaka umuti w’ikibazo.

Umunyamabanga nshingwabikorwa w’umurenge wa Kigabiro, Aman Muhamya, agira ati “Amarondo agomba gutangira saa moya aho kuba saa tatu naho ku manywa dufite inzego z’umutekano zirimo DASSO mujye mubifashisha igihe muhuye n’ikibazo ku manywa kandi hakabaho ubufatanye namwe abaturage kandi icyo kibazo tuzakiganiraho n’inzego z’umutekano”.

Kanda hano ujye ubona amakuru yihuse kandi kugihe kuri Facebook no kuri twitter

Ngabonziza Justin/Bwiza.com

from bwiza http://ift.tt/2vr9rkD
via IFTTT