Abanyarwanda birukanwe muri Tanzania batujwe mu Murenge wa Cyanzarwe mu Karere ka Rubavu, mu Ntara y’Iburangerazuba, ntibishimiye ubuzima babayemo, aho bavuga ko bimwe ibyangombwa by’amazu n’iby’imirima bahawe ndetse ngo n’abasirikare bakaba bababuza guhinga kuko umutekano utizewe neza.
Imiryango igera kuri 24 y’Abanyarwanda birukanwe muri Tanzania niyo yatujwe mu Murenge wa Cyanzarwe mu Karere ka Rubavu kuva mu myaka itatu ishize. Aba bishimira umutekano bafite mu Rwanda ugereranyije n’uko bari babayeho muri Tanzania, ariko ngo ubuzima babayeho bukaba ari ihurizo rikomeye, aho abenshi muri bo ngo bahagarikiwe amafaranga y’ingoboka bahabwaga muri VUP ku buryo kuri ubu ngo ubuzima bubagoye cyane.
Bamwe muri aba baturage basuwe n’umunyamakuru w’Ijwi rya Amerika ukorera mu Rwanda, bavuga ko babayeho nabi kuko ngo basa nk’abadafite uburenganzira bwo guhinga amasambu bahawe ari yo bari batezeho amakiriro.
Umwe muri aba baturage yagize ati: “Dufite imbogamizi y’uko nyine..isambu baduhaye, bayiduha twatanya n’ubutaka bwo muri Congo, iyo tugiye kubuhinga ingabo ziratwirukana ngo twe guhinga…zitubwira ko hashobora kuziramo n’abanzi bakivanga muri twe cyangwa bakatuvutsa natwe ubuzima.”
Undi agira ati: “Urebye mbese ntaho turi. Ni akarima bari baduhaye na ko turi kujya kugahinga abasirikare bati ntabwo mwemerwe kugeramo. N’umunsi w’ejo hari n’abakubitiweyo twagiye gutangira guhinga ubwo twahise ducika n’intege nta n’ubwo tuzongera gutekereza no kongera gusubirayo.”
Aba baturage bakaba bavuga ko no mu gihembwe gishize cy’ihinga ariko byabagendekeraga ku buryo bahinze nyuma y’abandi kandi n’abahinze ntibabone uko babagara cyangwa gukurikirana imyaka yabo mu bundi buryo, byose ngo bitewe no gutinya ko umwanzi yabihishamo akaza guhungabanya umutekano nk’uko babibwirwa n’abasirikare bababuza kujya muri iyo mirima.
Ku ruhande rw’igisirikare cy’u Rwanda, umuvugizi wacyo, Brig. Gen. Ferdinand safari akaba yabwiye Ijwi rya Amerika ko kuvuga ko hari ikibazo cy’umutekano mucye mu kibaya kirimo imirima y’aba baturage birukanwe muri Tanzania byaba ari igihuha.
Ati: “Ngirango urabizi mu gihe gishize umwaka ushize cyangwa 2015 ndakeka, higeze kubaho gucengera. Ni cyo gihe gito cyonyine bababujije kujya bajyayo kugirango badashobora kuhagirira ibibazo.”
Umuvugizi w’ingabo yabwiwe ko amakuru abaturage batanze ya vuba, bavugaga ko bemerewe nibura iminsi ibiri mu cyumweru yo kuba bahinga, ariko nabwo ngo nko kuwa mbere ngo wari umunsi wo kujya uhinga ariko barabagaruye.
Brig. Gen. Safari ati: “Ngirango igikuru n’uko ubuyobozi buhari bushaka kubafasha, kandi ngirango barabafashije bihagije. Ngirango ibyo byaba ari ibihuha. Nta kibazo cy’umutekano gihari.”
Naho umuyobozi w’akarere wungirije ushinzwe imibereho yiza y’abaturage, Uwampayizina Grace, avuga ko ikibazo cy’abasirikare bakumira abaturage bakababuza guhinga ari bwo bakicyumva, ariko yizeza ko hari ikigiye gukorwa.
Yagize ati: “Kuba bashobora kuba babagarura ntabwo mbizi, ariko wenda icyo ngicyo twacyivuganaho n’abashinzwe umutekano, kuko ntabwo twavuga ngo abantu bajye guhinga ariko bahungabanya umutekano, cyangwa bashobora gukora ibikorwa byatuma n’umwanzi atwinjirana. Ngirango murabizi ko hariya hakurya, ni ho FDLR iba, birashoboka ko bashobora kubikora babikora mu kajagari, n’umwanzi akaba ashobora kutwinjirana yiyitirira ko nawe ari muri ba bandi baje guhinga.”
Ku kibazo kijyanye n’ibyangombwa by’amazu cyangwa imirima bahawe ku biryo babikoresha basaba inguzanyo, visi meya yahakaniye aba baturage agira ati: “Kuko ariya mazu ni ayo kugirango tubafashe, ntabwo ari amazu atangwaho ingwate, ntabwo ari amazu bakodesha, ni amazu yo kubafasha kugirango bashobore kubamo. Niba ari umuntu utishoboye ejo mu gitondo iyo amaze kuyigurisha, cyangwa yayitanzeho ingwate, arongera akatubera umuzigo kandi icyo kibazo twari twarashoboye kugikemura.”
Umusirikare w’u Rwanda mu gikorwa cyo gusana inzu y’Umunyarwanda wirukanwe muri Tanzania
Iyi miryango 24 yavuye muri Tanzania yatujwe mu Mudugudu wa Bugu, mu Kagari ka Busigari mu Murenge wa Cyanzarwe, ituye mu mazu atuzuye neza imbere, ariko harimo ayasanwe n’ingabo z’u Rwanda igice cy’inyuma.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
from bwiza http://ift.tt/2vL3lbH
via IFTTT
No comments:
Post a Comment