RDC: Loni yemeje ko impuguke zayo, Sharp na Catalan, zishobora kuba zarishwe n’inyeshyamba

Iperereza ry’Umuryango w’Abibumbye ryasanze impuguke 2 zawo ziherutse kwicirwa muri Congo zishobora kuba zarishwe n’inyeshyamba, ariko ngo nubwo nta bimenyetso bihari ntibikuyeho ko haba hari abandi babigizemo uruhare.

Micheal Sharp, umunyamerika wari umuhuzabikorwa w’itsinda ryigenga ryari rishinzwe kugenzura uko ishyirwa mu bikorwa ry’ibihano ryubahirizwa, na Zaida Catalan, Umunyasuedekazi bari kumwe, bishwe kuwa 12 Werurwe bari mu iperereza rya raporo y’Akanama k’Amahoro n’Umutekano ka Loni.

Imirambo y’aba bombi yaje kuvumburwa nyuma y’ibyumweru bibiri bishwe. Umunyamabanga Mukuru wa Loni, Antonio Guterres akaba yarashyizeho itsinda rigomba gukora iperereza rikaba ryarashyikirije raporo yaryo Akanama k’Amahoro n’Umutekano kuri uyu wa Kabiri ushize.

Iri tsinda muri raporo yaryo rikaba rivuga ko agatsiko k’abakongomani, bashobora kuba ari inyeshyamba zo mu Ntara ya Kasai yo Hagati, ari ryo riri inyuma y’urupfu rwa Sharp na Catalan nk’uko kopi y’iyi raporo Reuters dukesha iyi nkuru yabonye kuri uyu wa Gatatu ivuga.

Nubwo iyi raporo ivuga ko aba bantu bishwe n’inyeshyamba, ntivuga izo nyeshyamba umutwe zibarizwamo n’icyo zari zigamije zikora ubu bwicanyi.

Guverinoma ya Congo ariko kuwa 24 mata I Kinshasa ikaba yareretse itangazamakuru video  bavuga ko yagaragaje ko inyeshyamba za Kamuina Nsapu ari zo zishe izo mpuguke za Loni. Bombi ngo bararashwe, ariko Catalan ahita anacibwa umutwe.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com

 

 

from bwiza http://ift.tt/2w4NIP8
via IFTTT