Odinga ati “Nta mpamvu yo gukoresha urugomo ngo ubone ubutabera”

Kuri uyu wa gatatu Raila Odinga yatangaje icyo agiye gukurikizaho nyuma y’icyumweru bitangajwe ko yatsinzwe amatora ariko we ntabyemere kuko ngo yibwe. Yavuze ko agiye kwiyambaza inkiko, ariko anasaba ko hatagira ukoresha urugomo n’ubugizi bwa nabi ukundi.

Nubwo mbere yari yabyanze, kuri uyu wa gatatu Raila Odinga yavuze ko ari buregere Urukiko rw’Ikirenga ariko akanakomeza imyigaragambyo mu mahoro. Photo Simon Maina/AFP/Getty Images

Odinga yatangaje ko agiye kuregera urukiko rw’ikirenga kuko amatora ngo ibyayavuyemo byatanzwe na mudasobwa byabayemo kwiba amajwi ye.

Ati “Iyi ni intangiriro, ntabwo tuzabyemera.”

Uhuru Kenyatta yatsinze arushije Odinga amajwi abarirwa kuri miliyoni 1,4. Odinga ariko yari yavuze na mbere y’amatora ko afite impungenge ko azibwa amajwi.

Kenyatta we yatangaje ko bitumvikana uburyo umuntu atsindwa inshuro zirenze eshatu agahora avuga ko yibwe.

Odinga ntabwo aragaragaza ibimenyetso bishimangira ikirego cye ko hari aho yibwe amajwi nk’uko bivugwa n’ikinyamakuru Nation.

Amaze gutsindwa yamaganye ibyavuye mu matora asaba n’abamushyigikiye kubirwanya. Abantu bagera kuri 24 baguye mu myivumbagatanyo yabahanganishije n’inzego z’umutekano.

Odinga yaraye avuga ko Kenya ubu ngo igabanyijemo kabiri ngo irimo uruhande rw’abahisemo kubaho bategetswe n’igitugu n’abahisemo ubwisanzure na demokarasi.

Mu gihe agiye kugana urukiko rw’ikirenga, Odinga yasabye abamushyigikiye ko mu gihe bamagana ibyavuye mu matora bakwirinda kujya mu rugomo.

Ati “Mwigaragambye mu mahoro mwanga kumvira ibyo musabwa. Tuzarara amajoro, dufate ibihe byo gucece, tuvuze ingoma dukore ibintu byose twerekane mu mahoro akarengane kadukorewe mu matora. AbanyaKenya ntibakwiye gukoresha urugomo ngo babone ubutabera.”

UMUSEKE.RW   

from UMUSEKE http://ift.tt/2uKR3CZ