Muhanga: Ubuyobozi bw’akarere bwunze umuturage na gitifu wamennye ibiryo by’ubukwe

Ubuyobozi bw’akarere ka Muhanga, bwunze umuturage witwa Minani Sylvestre n’umunyamabanga Nshingwabikorwa w’akagari ka Kinini mu murenge wa Shyogwe wamennye amafunguro ku munsi w’ubukwe ngo ntibagiye kwamamaza.

Muri Nyakanga nibwo Minani yari afite ubukwe, ubwo yakiraga abashyitsi mu rugo ngo nibwo umunyamabanga nshingwabikorwa w’akagari, Uwimana Fotide yahabasanze adobya ibirori, abaturage bakamushinja kubamenera amafunguro [ibyo kurya no kunywa] ngo ni uko batagiye gukurikira ibikorwa byo kwiyamamaza, gusa we yabihakanye avuga ko byamenetse bamwikanze.

Minani yavugaga ko byamubabaje cyane kubona umuntu amutera mu rugo rwe akamubuza kwiyakirira abantu ndetse bigateza imvururu  mu rugo rwe, n’abari batashye ubwo bukwe bagayaga imyitwarire  y’umuyobozi mu gihe byateganywaga ko ibikorwa byo kwamamaza bijyamo ubushaka.

Gitifu Uwimana Fotide na Mnani Sylvestre bamaze kwiyunga:

Ni nyuma y’uko itsinda rigizwe n’muyobozi w’akarere ka Muhanga, umuyobozi wungirije w’akarere ka Muhanga ushinzwe  ubukungu n’iterambere ry’akarere, umunyamabanga nshingwabikorwa w’umurenge wa Shyogwe, umukuru w’umudugudu Minani atuyemo ndetse na bamwe mu bashyitsi yakiraga ubwo ibyo bibazo byahaberaga,… rihuje impande zombi, bariyunga.

Ubuyobozi bw’akarere  ka Muhanga bwarabunze bamaze kumva icyo babivugaho, Gitifu asaba imbabazi uyu muryango ndetse anahabwa inama zitandukanye n’aba bayobozi.

Minani avuga ko na we yamubabariye kandi kugeza ubu akaba yumva yararuhutse ku mutima, kuko uwamuhemukiye yamusabye imbabazi.

Agira ati “yarambwiye ngo ntabwo yari agambiriye kumpemukira ahubwo ni ibyamugwiririye bitewe nuko n’ubundi byari byararangiye nta kindi nari bukore naramubabariye, ubu nta kibazo mfite”.

Nubwo yasabye imbabazi Minani, Umunyamabanga Nshingwabikorwa we avuga ko ikosa yakoze ari  uko yinjiye mu rugo abaturage bamwikanga batinya ko abafotora bakiruka, bigatuma n’ibyo bateguye byo kunywa no kurya bimeneka.

Umuyobozi w’akarere ka Muhanga, Uwamariya Béatrice, avuga ko n’itsinda bari kumwe icyari cyabazinduye atari ukubunga cyangwa se kubahuza, ahubwo ko bari bagamije kureba koko niba uko ikibazo cyari cyavuzwe hirya no hino ariko kimeze.

Avuga ko bamaze kumva impande zose, ngo basanze atari ibintu bikomeye ahubwo ko byagiye bitizwa umurindi n’abaturage bamwe na bamwe, bari bafitanye ibibazo n’umunyamabanga nshingwabikorwa w’akagari.

Kanda hano ujye ubona amakuru yihuse kandi kugihe kuri Facebook no kuri twitter

Uwambayinema M.Jeanne/Bwiza.com

 

from bwiza http://ift.tt/2vKIt4t
via IFTTT