Ibihugu byo muri Afurika bimaze kugura intwaro nyinshi mu Bufaransa kuva mu 2012

Ibihugu byo mu majyaruguru ya Afurika nibyo biza imbere ku rutonde rw’ibihugu byo kuri uyu mugabane bigura intwaro nyinshi mu gihugu cy’u Bufaransa, aho ikiza imbere ari Misiri imaze kugura intwaro zifite agaciro ka miliyari 2,7 z’Amayero nk’uko bigaragara muri raporo yashyikirijwe inteko ishinga amategeko ku igurisha ry’intwaro muri Afurika yo muri Nyakanga 2017.

Iyi nkuru dukesha Jeune Afrique iravuga ko uruganda rw’intwaro mu Bufaransa rutigeze rwitwara neza mu gucuruza intwaro nko muri iki gihe, aho Abanyafurika baza imbere mu bakiriya b’imena.

Nk’uko bigaragara muri iyi nkuru, ku butegetsi bwa perezida Francois Hollande u Bufaransa bwagurishije intwaro nyinshi muri Afurika ku buryo hagati ya 2012 kugeza mu 2016 u Bufaransa bwagurishije Misiri intwaro z’ubwoko bwose zifite agaciro ka miliyari 2,765,900,000, harimo by’umwihariko indege z’intambara zo mu bwoko bwa Rafale zakozwe n’uruganda rwa  Dassault Aviation.

Indege z’intambara zo mu bwoko bwa Dassault Rafale

Ku rutonde rw’ibihugu byo muri Afurika byaguze intwaro nyinshi kurusha ibindi mu Bufaransa, ku mwanya wa mbere haza Misiri, ikurikirwa ariko kure cyane n’igihugu cya Maroc cyaguze intwaro zifite agaciro ka miliyoni 665,2, gikurikiwe na Algeria yaguze intwaro zifite agaciro ka miliyoni 212,1 z’Amayero.

Naho ibihugu byo muri Afurika yo munsi y’Ubutayu bwa Sahara icyaguze intwaro nyinshi ni Senegal na miliyoni 48 z’Amayero, ikurikirwa na Gabon na Miliyoni 40, Burkina Faso na miliyoni 33, na Afurika y’Epfo na miliyoni 29 z’Amayero.

Kuva mu 2012 kugeza mu 2016, umugabane wa Afurika muri rusange ukaba waraguze mu Bufaransa intwaro zifite agaciro ka miliyari 3,939 z’Amayero. Uyu mugabane ngo ukaba uzakomeza kongera intwaro ugura mu Bufaransa kubera abajenerali bo mu Misiri ngo bakubye inshuro 14 kuva mu 2012 intwaro baguraga. Iki gihugu rero kikaba ari umukiriya w’ingenzi w’intwaro zicurirwa mu nganda zo mu Bufaransa.

 

Kanda hano ujye ubona amakuru yihuse kandi kugihe kuri Facebook no kuri twitter

 

Dennis Ns./Bwiza.com

 

from bwiza http://ift.tt/2uWrBX2
via IFTTT