Bucura bwa Rubangura ngo mukase ari kwanga kumurihirira kandi yarabitegetswe

*Umubyeyi w’uyu mwana ati “Ni gute umwana wa Rubangura yabura amafrw y’Ishuri.”
*Uvugwaho kwanga kwishyurira umwana avuga ko umuryango uri kubishakira umuti.

Umugiraneza Cecile wari umugore muto w’umuherwe nyakwigendera Rubangura Vedaste avuga ko Kayitesi Immaculee (umugore mukuru) atari kubahiriza neza ibyemezo by’inkiko zategetse ko agomba kwishyurira amashuri abana be (Umugore muto). Ngo umuhererezi wa Rubangura uvuka kuri Cecile yamwishyuriye igice muri Kaminuza ahita abihagarika, we avuga ko umuryango uri kubishakira umuti.

Bucura bwa Rubangura ngo mukase ari kwanga kumurihirira kandi yarabitegetswe

Mu nyandiko mvugo y’uru rubanza, igaruka ku nyandiko y’irage y’umuherwe nyakwigendera Rubangura Vedaste, wari wanditse avuga ko umutungo we wacungirwa hamwe ugafasha abana be bari bakiri bato gukomeza amshuri bakarangiza kaminuza

Imyanzuro y’urukiko Rukuru rwari rwajuririwe na Kayitesi Immaculee ku kemezo cy’urukiko rwisumbuye rwa Gasabo, igaragaza ubujurire bwe nta shingiro bufite.

Urukiko rwisumbuye rwa Gasabo rwari rwategetse ko uyu mufasha mukuru w’umuherwe Rubangura azishyurira amashuri abana ba Umugiraneza Cecile (umugore muto).

Icyemezo cy’Urukiko Rukuru cyashimangiraga iki cyo mu rwisumbuye rwa Gasabo, cyanasabaga Kayitesi Immaculee kwishyura Umugiraneza 4 234 639 Frw yari yishyuriye umwe mu bana be.

Umugiraneza Cecile wasigiwe na Rubangura abana babiri, avuga ko mugenzi we yishyuriye yabanje kujya yishyurira aba bana be (ba Umugiraneza) nyuma akaza kubihagarika.

Gusa avuga ko na bwo yabikoraga mu mananiza. Ati “Abishyurira muri Ecole Belge ubundi agahagarara, na none bikajya mu nduru, akishyura akagera aho agahagarara.”

Avuga ko kubera igitutu yakomeje kumwotsa no kubera iki kemezo cy’urukiko, Kayitesi yishyuriye umwe muri aba bana abereye mukase akarangiza ikiciro cya gatatu cya kaminuza.

Ati “Ubu yararangije maitrise ariko mu ngorane zikabije, akabikora uko abishaka ariko kuko hari itegeko akabikora.”

Umugiraneza avuga ko umuto muri aba bana wari utangiye amasomo muri kaminuza mukase (ufite inshingano zo kubishyurira) yamwishyuriye igice agahita abihagarika.

Ati “Nagiye kumureba nti se makurata bite ko utarihirira umwana?…ngo yagiye mu ishuri rihenze… nti se rihenze rite kandi yaragiye mu ishuri mukuru we yize…ati nta mafaranga ahari…”

Avuga ko aya ari amananiza kuko imitungo Rubangura yasize itaburamo amafaranga yo kurihirira umwana ishuri.

Ngo baganiriye yamusanze ku nyubako izwi nko kwa Rubangura, ati “Ndamubwira nti aha honyine twicaye harihirira umwana,…nti umunani w’umwana ni amashuri, ati ‘nta mafaranga ahari, ntabwo tugikora’ ndamubwira nti ariko nta n’ikibinyemeza, niba mutagikora hari amazu akodeshwa…mpava tutumvikanye.”

Umugiraneza avuga ko ubu yashyikirije ikirego Ubushinjacyaha kirega mukeba we kutubahiriza ibyemezo by’inkiko.

Uyu mubyeyi avuga ko yiteguye kuburana na mukeba we, ati “Ariko ubundi ni gute umwana wa Rubangura yananirwa kwiga ngo nta mafaranga ahari!”

Kayitesi Immaculee uvugwaho kwanga kurihira umwana abereye mukase, avuga ko umuryango uri gushakirwa umuti ibi bibazo.

Ati “Kandi twizeye ko ibisubizo bizaboneka, mu gihe byaba bidashobotse uruhande rubangamiwe ruzitabaza inkiko.”

Martin NIYONKURU
UMUSEKE.RW

from UMUSEKE http://ift.tt/2wjwxsz